25 March 2025: Mizoram Larsap General (Dr) Vijay Kumar Singh, Chief Rector of Mizoram University chuan Mizoram University (MZU) Convocation vawi 19-na, Multipurpose Hall, MZU Campus, Tanhrila neih chu vawiin khan Khuallian niin a hmanpui a, Chief Minister Pu Lalduhoma chu Khualzahawm a ni.
Larsap General (Dr) Vijay Kumar Singh chuan MZU Convocation vawi 19-na kaltlanga degree, gold medal leh lawmman dawngtu zawng zawngte duhsakna hlanin, he hunah hian zirna a hlawhtlinna mai nilo tanrualna a taka lantirna lawm tura kalkhawm kan ni a, tuna hlawhtlinna kan chante hi hmalam hun atana min kaihruaitu leh chakna min petu nise a duhawm hle ang, a ti.
Khualzahawm Chief Minister Pu Lalduhoma chuan degree dawng tharte a lawmpui thu sawiin, hun reilote chhunga North East India-a University changtlung berte zing ami a ni thei chu chhuanawm a tih thu sawiin, Mizorama zirna sang ber a nih angin zirlai leh researcher-te tan hmasawnna tur thil thar a chhawpchhuah sak zel a beisei thu a sawi a ni.
MZU Convocation-ah hian MZU hnuaia zirlai 7724 te hnenah degree hlan a ni a. Vawiina inlan Doctor of Philosophy 104, Master’s Degree 567, Master’s Professional 149, Bachelor’s Degree 143, Bachelor’s Professional 176, Gold Medalist 51 leh Book Prize winner 3 te kutah degree leh lawmman hlan a ni.
Mizoram University hi kum 2001 khan din niin, tun dinhmunah Department 37 a awm a. Centre 2 te’n School of Study 10 ah UG, PG leh Ph.D programme an kalpui mek a. Affiliated College 40 leh Constituent College 1 a nei mek bawk.
