“Zofate Biak In kan neihloh avangin kohhran pawl angin kan indo… Hnam Biak In kan nei anga hnamah kan insuihkhawm vek ang” – Rev Dr Zaichhawna Hlawndo
05 April 20245: Vawiin chhun khan Zoramthar Zofate Lairelna hotupa Rev Dr Zaichhawna Hlawndo chuan Lunglei Press Club-ah thuthar thehdarhtute kawmin; Zofate Pathian Biak Inpui hnatlang, Lunglei khawpuia hawnna chungchang a sawi.
Rev Dr Zaichhawna chuan Biak Inpui sak tur hi kum 2003 daih tawhah Pathian hnen atanga a dawn tawh thu leh Biak Inpui chu khawvel hnamtin hnena Pathian chanchintha thehdarhna hmunpui tur a ni, a ti a. Zofate hi Meitei, Hindu leh Mosolman te awpbehna hnuaiah te, Modi-a awpbehna Hindu hnuaiah te saltang kan ni a, chumi atanga kan chhuah theihna tur leh hnam hruikhat kan vawn theihna turte hnama kan chian theihna tur atan te Biak Inpui hi sak tum a ni, a ti. Hnam-a chian kan tih hian Mizo-a chian a ni lova, Zohnahthlak hnam zawng zawngte’n Zofa kan ni tih kan pawm tlàn a ngai a ni, tiin; Mizo tih ringawta chian tum hi a diklo, a ti a. Kohhran pawl hrang hrangin Biak In kan neia Zofate Biak In kan neihloh avangin kohhran pawl angin kan indo a, chuvangin Hnam Biak In kan nei anga hnamah kan insuihkhawm vek ang, a ti bawk.
Rev Zaichhawna chuan Biak Inpui sak hi Pathian thiltum a ni, ti bawkin; India rama kan awm chhung chuan kan ram, kan hnam, kan sakhua hi a him tak tak dawn lo, a ti a. Zofate Biak Inpui kan sak hunah chuan hnamah kan chiang ang a, kan hnam indentity chu Zofate Biak Inpui hi a ni dawn a, chumi hunah chuan kan ram leh kan hnam, kan sakhua a himna turin independent kan nei ang tih Rev Zaichhawna chuan sawiin; independent kan neih hma chuan kan hnam leh sakhua hi a him dawn lo, a ti a. MP Inthlan lo awm turah Mizo hnam tan ka din a tul nia ka hriat avangin party hrang hrang President-te hnenah mipui candidate atana min hmang turin ka bia a, kan lo ngaihtuah ang an tih laiin candidate an siam leh vek ta si a, Pathianin MP Inthlan lo awm turah hian ka din a rem tih rihlo-ah ka ngai, a ti.
Zawhna chhangin Zofate Biak Inpui sakna hmun tur laihzawl a nih tawh thu leh a sak dan tur chu engineer-te ruahman tir tur a nih thu leh Biak Inpui sak hna chu hnam hnatlang angin thawh zel tur a nih thu a sawi a; kumin hian a ban phun hman hram an tum thu te, Budget Estimate Rs nuai sing 1 a nih thu leh kum 3 chhunga sak zawh ngei an tum thu te a sawi bawk.
Rev Dr Zaichhawna’n thuthar thehdarhtute a kawmnaah hian Zoramthar hruaitu thenkhatte’n an tawiawm a ni.
