02 Oct 2025: Tukin khan Chief Minister Pu Lalduhawma chu Lawngtlai atanga lo pheiin, Thingfal (Mamte) BCM Biak in, leiminin a tihchhiat chu a hmunah tlawhin, an harsatna tawh te a enpui a, tanpuina pawisa fai Rs.20,000 a hlan. Kohhran hruaitute an lawm hle. A hun chep tak karah Lunglei South MLA Pu Lalramliana Papuia te inah tukthuan a ei a, ZPM Southern Headquarters Elected Office Bearer-te’n an kilpui a, Lunglei mamawh hrang hrang CM hnenah hian an thlen a, Chief Minister-in a chhan danah ZPM Southern Hqrs hruaitute an lawm hle niin ZPM Southern Hqrs thuchhuah chuan a tarlang.
Chief Minister hnena an thu thlente:-
# Lunglei Market and Trade Centre: He hna hi Contractor chu Ni 25.08.2024-a zo tura tih a ni a, mahse a hunchhunga a zawh hman loh avangin Ni 30.09.2025 thleng pawh sei sak a ni. PWD Lunglei Building Division report danin a hna hi 83% zawh a ni tawh a, 17% thawh zawh loh ang a ni. Mipui chhawr theih tura a rang thei ang bera peih anih theih nana hma lakpui turin an thlen a ni.
# Lunglei Town Road Resurfacing: PWD Lunglei Road Division-I hnen atanga kan thudawn danin Work Proposal siama sawrkara thawn a ni tawh a, Finance Approve nghah a ni, an ti. Lunglei khawpui kawng hi siamthat thuai anih theih nan an thlen.
# Thuamluaia Mual tih changtlun: Floodlights siamna tur 2024 – 2025-a SASCI sum Rs.Nuai 400 dah chu hman a ni ta lo. Hei hi a remchan dan anga tihhlawhtlin vat anih theih nan leh Pavillion sak that anih theih nan hma laksak turin.
# State Sports Academy Zobawk chungchang: Kum 2010 atanga siam tan a ni a, Tlawnglui hnar a nihna tlawh chhanin National Green Tribunal-in Court-ah a khing ta a, Court chuan stay order ti chhuakin tun thleng hian chawlh san a ni ta a. Hetianga sawrkarin mipui hmasawn nana sum tam tak senga a hmalakna zawh fel tep tawh hman tangkai theih loha a awm hi a uihawm hle a, chuvangin he State Sport Academy hi mipuite’n tangkai taka kan hman thuai theih nana tihhlawhtlin ngei ni thei se, tiin an thlen.
# Lunglei Fire Sub-Station dah chungchang: Hrangchalkawn leh Serkawn emaw Zotlang-ah Fire Sub-Station dah sak turin an thlen.
# Chhim lamin Airport puitling a mamawh thu an lo thlen bawk.
