Billy Ray Cyrus, Country singer lar tak thin chuan August ni 25 khan kum 62 a lo pumhlum ve ta. A hla lar thin zet, kan thupuia ka hman hian ka rilru a hneh em em bakah amah hi ka ngaisang ve hrim hrim a, ka han thailang ve a ni. Hman deuh tawhah khan an nupa kar fello avangin inthen zâi an lo rêl tawh leh nghal a, a pawi thin ngawt mai. Heng milar ho hi an innei zung zung a, an inthen leh zung zung zel mai a nih hi.

Thangtharte’n thawk khat laia an atchilh luai luai Miley Cyrus hi chu kan hre fur hlawm a, mahse tunge a pa tih leh heti taka rimawi khawvela lar thei tur a chherchhuaktu hi a pa, Billy Ray Cyrus, hi a ni tih lam chu kan ngaihtuah ngailo maithei. A pa, Billy Ray Cyrus hi rimawi khawvelah pa namai a ni lo a, hetianga fanu zaithiam lar a nei hi thil mak a ni lo asin; han chhiar teh mah :

Country rock star zinga pian nalh, zei bawk si leh pa tak mai Billy Ray Cyrus-a’n tho at maia ‘Achy Breaky Heart’ a han sa hi chu a lo ngaithlatu tan pawh awm hle hle chu a har thin a nih hi. Album copy maktaduai 13 zet hralh tawhtu (a la hralh mek) Billy Ray Cyrus hi 1992 khan ama band Sly Dog te nen country music khawvel-ah mi hriat an hlawh tan a. Sly Dog ho vang liau liau-a country music khawvela par rawn chhuang thei a ni tih hi Billy Ray hian a hre chiang hle a ni. Hemi tichiang em em tu chu a thian tha leh mi chinchang hre deuh te’n session musician thiam tak tak hmanga uluk taka hla record tura an thuràwn a zawm duh miah lo hi a ni. A ngaihdan chuan, “Music khawvela tuisik leh maian pawh tluk lo ka nih lai a\ang tawh a min lo buaipui thintu ka band Sly Dog hi kalsanin session musician ho ka bèl ang maw? A theih loh, sessionist ho chu an thiam tih ka pha lo, mahse studio-ah pawh ‘dio’ lo-ah pawh min remsak-a part min pe tur hian Sly Dog hi an tling tawk, ka phat san dawn lo,” a ti daih mai. A ngaihsanawm ngawt mai.

Sly Dog guitarist Terry Sheldon hian Nashville khawthlang lam ramngawa a log cabin (Thing In)-ah studio tha zet a nei pek a. Band member dang – Michael Joe Sagraves, Corky Holbrook, Greg Fletcher, Burton Steven leh an hla phuahtu ber pakhat Don Von Triess te nen Billy Ray ho hian music style thar leh hla thar chherchhuah tumin chu lai ramngaw pilril angreng takah chuan inkhurbingin an ri bur bur thin a. Hetia an music style chherchhuah hi Homegrown music (tualchher music) an ti ve mai a, he style hmang hian a album changkang tak ‘Trial Of Tears’ kha an puitlin a nih kha.

Chutia an tualchher music hmanga Trial Of Tears album an han released ta chiah mai chu rin ai daihin miin an lo hlut ta mai a. Country music khawpui Nashville leh Kingston Springs velah te chuan an hralh zo duak duak ta mai le. “Tun tum ka album zet chu a hmasa ho ai chuan ka chhuang ber àwm e. Tualchher music hi a lo iaiawm lo khawp mai. Sum tam tak sênga khawi studio-ah emaw sessionist ho nena record aiin a that loh bikna reng reng ka hre lo,” Billy Ray chuan a ti hial a ni.

Nashville khuaa Mercury Nashville Records Company President Luke Lewis pawhin a fuih nasa-in a phurpui hle bawk a, heng vang te pawh hian a record hian hralh a tlak phah leh zual hle bawk. Luke Lewis hi pa ropui tak a ni hrim hrim; country star lar tak tak – Shania Twain, Terri Clark, Kathy Mattea leh star lar tak tak ho lo tanpuia lo encourage thintu a ni a; heng ho pawh hi country music-a hlawhtling tak tak te an ni hlawm nghe nghe.

Billy Ray-a pi, pi, pi leh chhawng (great, great grand mother) hi Cherokee Indian niin; a pa hi violin tum thiam eltiang a ni bawk a, a pa pawh hi gospel singer niin, a nu hi piano tum thiam tak a la ni cheu bawk. Chutiang nu leh pa leh pi leh pu kara lo seilian Billy Ray Cyrus-a’n rimawi khawvela hming a rawn chher chho hi thilmak a ni hauh lo mai.

American leh Cherokee Indian thlah-pawlh a nih avang hian a hmel te pawh hi a tha-in a hleitling zeih zawih bawk a, 1984 – 1986 lai vel khan film star nih tumin Hollywood lamah te pawh a lo zu in-borti ve tawh a, mahse lemchan khawvel hi a kalna tur lam a ni lo a ni ang, Kentucky lamah bawk a rawn kir leh ta a ni.

Kum 5 zet rimawi khawvel a bikbo san hnu-in 1991 khan Mercury Records Company-ah contract a sign a. A band Sly Dog ho nen hian West Virginia leh Kentucky vela club hrang hrangah an zai kualin anmahni tawkah fans pawh an ngah ve hle thin. Tichuan a hit ropui lo ni ta ‘Achy Breaky Heart’ singles chu a han released ta a le, country music-ah chuan a aia tha a awm thei tawh dawn chuang em ni tih mai tur hiala mawi, country rock hla dik tak Achy Breaky Heart chuan Country Music Association buatsaih ‘Singles Of The Year Award’ chu a la chiang kher mai. He hla mawi tak avang hian Billy Ray Cyrus chu Nashville leh Kentucky mai ni tawh lovin, USA mai pawh ni bawk lovin, khawvel huapa country star lar ber pawlah a invawrh chho ta lawp mai a ni.

A debut album, a thupuia ka hman ‘Some Gave All’ pawh hi a mawiin belhchian a dawl hle. Copy nuai tam fê a hralh bakah Grammy Award nomination category 5 laiah a hmu pha ve hrim hrim hi a lar zia tilangtu chu a ni àwm e. Heng a hla mawi tak tak – Could’ve Been Me, She’s Not Cryin’ Anymore, In The Heart Of A Woman, Somebody New leh Words By Heart te hi country charts-ah Top Ten-ah an awm thei vek zu nia.

Heti taka country music rawn vawrhlar thar lehtu leh style thar danglam rawn chher-chhuaktu a nih avang hian Billy Ray Cyrus hi The American Music Awards, The Country Music Association leh The Juno Awards buatsaihtute hian lawmman ‘trophy’ a hranpa ngatin an hlan theuh asin; nep lo mai mai tak mawle. A zaithiam vanga fans ngah chu ni thawkhat mahse mi rethei leh chhumchhia, naupang baihvai leh fahrah te khawngaih leh lainattu a nih avang hian mi duh leh ngaihsan a hlawh phah leh zual hrim hrim a, a lehkhathawn hmuh hnem theih zia te chu “nitin truck load khat average-in a hmu ang e” an ti nia.

1996 khan TNN (The Nashville Network) chuan Entertainer of the Year-ah a puang a, Music City News Country Awards-ah nomination a hmu pha ve leh bawk. A lar zia lanna pakhat chu hei hi a ni : 1996 Atlanta (USA)-a Olympic nghah a nih khan Olympic meichher tlanpuitu (torch bearers) ho-in Tennessee an rawn tlan thlen khan Billy Ray Cyrus hi Olympic meichher tlanpuitu-ah thlan tel a ni ve tlat asin. Hun i neih phawt chuan Achy Breaky Heart leh Some Gave All tal hi chu lo ngaithla ve chhin teh reng, mawi i tih ve hi ka ring khawp mai. I lo ngaithla fo tawh a nih pawhin amah ngaihsanna nen hian han ngaithla ve leh reng reng teh, a birthday lawmpuina ni pah fawmin, manhla deuh a nia.

A hla zinga mawi ka tih leh a thu tha leh ropui ka tih em em chu Some Gave All hi a ni. Mi thenkhat te’n an neih zawng zawng leh an nunna thleng a midangte tana an pek laiin thenkhat te ve thung chuan thil tlemte chauh midangte tan kan kan pe ve tawk a ni tak si a, kan inchen lo hlawm teh e. Chatuana nunna misual te’n kan lo neih lehna chhan pawh Pathian Fapa Isua Krista inpekna pumpuhlum vang a nih hi.

‘All gave some, some gave ALL’
– Billy Ray Cyrus.