CM-in Cardiothoracic & Vascular Surgery Unit a hawng

15 Oct 2026: Chief Minister Pu Lalduhoma chuan nimin khan Zoram Medical College & Hospital, Falkawn-ah Cardiothoracic & Vascular Surgery (CTVS) Unit a hawng. He unit hi sorkar, Doctors for you leh SBI Mutual Funds Management te tang tlangin SBI Mutual Funds Management Limited CSR Rs. Vbch 3.7 sengin a din a ni.

Chief Minister hi Pi Baryl Vanneihsangi Tlau, MLA, chuan a tawiawm a, Dr. Rajat Grover, Chief People & Sustainability Officer, SBI Funds Management Ltd., Dr. Rajat Jain, President, Doctors For You ten an tel pui bawk.

Chief Minister chuan, kan Health & Family Welfare Minister Pi Lalrinpuii hian Mizoram chhung ngeia Super-Speciality enkawlna a awm theih nan hma ala nasa a. He CTVS Unit pawh hi 27th November 2024 a ka hova high-level meeting leh 28th November 2024 a ZMC & H ka tlawh hnua a hmalak zuina atanga rawn chhuak a ni a. Sum leh paia min tanpui turin SBI Mutual Funds Management leh Doctors For You te nen a indawrna a kalpui a, annin phur takin min lo thawhpui a, vawiinah kan lo hawng thei ta a. Min tanpuitu leh fund min petute chungah hian kan lawm hle.

ZMC & H hian tun hnaiah hma a sawn nasa a. Kumin March thla atang khan thisen zam zaina a kalpui tan a, 19th August 2026 khan Mizoram sorkar damdawi ina a vawikhat nan Lung zai hawnna (major open-heart surgery) hlawhtling taka neih a ni. He Lung zaina hi Dr. Mary Hmingthantluangi kaihhruaina hnuaiah Dr. Intekhab Alam, Apollo Excel Hospital, Guwahati leh ZMC & H OT Team-te nena neih a ni.

ZMC & H tihhmasawn zel hi kan tum a, SASCI atangin Dialysis Unit hi kan dah belh dawn a. Tuna pali chauh kan neih hi Rs. Vbch 5.6 senga a dang 21 dah belh kan tum a ni. A complex chhunga inkalpawhna kawng siam that ngai pawh hi kan thawk dawn a, hma kan la mek ni.

Mizoram hian CSR Fund hi kan hmu tlem bik hle a. Sum tam tak seng lo pawhin ram tana tangkai thil tam tak a thawh theih si a. Chuvang chuan CSR tam zawk kan hmuh theih nan Doctors for You te leh SBI Mutual Fund te pawhin min thawhpui zui zel kan beisei a. Mizoramah hma rawn lak chhunzawm zel ula kan duh a ni, tiin CSR lama Mizorama hma la zel turin a sawm a ni.

He hun hi Prof. Zoramthara Zadeng, Director, ZMC & H chuan a kaihruai a, Dr. Rajat Jain, President, Doctors for You chuan Project an kalpui dan sawiin, Dr. Rajat Grover, Chief People & Sustainability Officer, SBI Mutual Fund Management Ltd chuan Project chanchin sawina a nei a. Mizoram tana hmalak zel an chak thu an tarlang.

Prof. Lalnunmawi Sailo, Medical Superintendent, ZMC & H chuan lawmthu sawiin inkhawm hi a khar a ni.