CM-in Goa leh Chandigarh atanga thalai rual lo zinte a kawm

14 Oct 2026: Vawiin khan Chief Minister Pu Lalduhoma chuan CM Conference Hall-ah sorkar laipui hmalaknaa neih mek Yuva Sangham Youth Exchange Programme hnuaia Goa atanga thalai rual 50 Mizoram tlawha lo zin mekte leh Ashtha Laksmi Darshan hnuaia Chandigarh atanga thalai rual 20 Mizoram tlawha lo zin mekte chu a kawm.

Chief Minister hian Mizorama an cham chhungin a tam thei ang ber fang kuala, Mizoram nena inpawhna thuk tak, inhriattawna tam tak neih tum turin a chah a. Thalaite hi India ramin resource a neih hlu ber in ni a, kum 2047 a developed country nih kan tumna kawnga pawh mawhphurhna pawimawh tak chelhtute in ni. India ramah hnam hrang hrang kan cheng a, kan inkara inunauna tha neih hi ram hmasawnna tura kan hmalakna tinrengah a pawimawh avangin hetiang programme kan han buatsaih thinte hi a tangkai hle a ni, a ti a. Hlim taka hun hmang turin duhsakna a hlan a ni.

Zirlai naupangte hian Chief Minister hnenah hian zawhna hrang hrang an zawt a, hnam hrang hrangte inkara inunauna tha a awm theih nana a ngaihdan te, Mizoram economic hmasawnna atana a hmathlir Transform Mizoram Vision 2047 chungchang te, Mizo hnam nun ze mawi leh entawntlak tak tak chanchinte an sawipui a ni.