Engineering College tan vat anih theih nan hma la turin MZP-in thuneitute a ngen

14 July 2026: Mizo Zirlai Pawl Headquarters : Lunglei chuan vawiin khan Mizoram Engineering College, Pukpui-a mi chu tlawhin, hmathawh kal mekte an enfiah.

Mizoram Engineering College hnathawh enfiahnaah hian PHE, PWD leh P&E Department hotuten an telpui.

Mizoram Engineering College hnathawh kal lai mekah hian Department hrang hrang hnathawhte ngun taka en ho niin, tun dinhmunah hian PHE Department leh P&E Department hna chu thawh zawh tawh niin, PWD chan chu working season anih loh avangin hna hi za a sawmhnih bawr vel bak thawh a la ni lova, GSB phah chungchangah mimal ramte nena harsatna a awm bawk avangin Engineering College panna kawng hi duhthu a sam lo hle a ni.

Mizo Zirlai Pawl Headquarters : Lunglei chuan Engineering College building hrang hrangte enfiahin, classroom atana ruahmanah light leh fan quality chhe tak tak dah a ni chu pawi a ti hle a, building chhunga room hrang hrang tawp leh duhthusam lo tam lutuk chu thuneitu lamin a rang lama enfiah turin MZP Hqrs.Lunglei chuan a ngen a.

Mizoram Engineering College chhunga hnathawh kal mekte zingah Higher & Technical Education Department chan muang chang lutuk leh kutthlak mumal la awmlo chu MZP Hqrs Lunglei chuan pawi a tiin, H&TE Department chu tun aia Mizoram Engineering College ngai pawimawha ngaihsak turin a ngen nghal bawk a ni.

H&TE Minister Dr. Vanlalthlana’n Mizoram Engineering College 2026/2027 Academic session-a tan tura alo puan tawh chu tun dinhmunah Mizoram Engineering College hmunah hian tan theih a ni dawn lovin a lang a, ruahmanna felfai zawk nena Engineering College hi bul tan vat anih theihna atan hma la turin thuneitute MZP Hqrs Lunglei chuan a ngen a, Mizoram Engineering College chu tan vat anih theihna atan MZP
Hqrs Lunglei chuan hnathawh kal mekte chu a vil zui zel dawn a ni.