India rama kuhva thar tam lamah Mizoram pangana

09 Oct 2026: Vawiin khan Vanapa Hall, Aizawlah kuhva chingtute tan “Training cum Seminar on the Scientific Cultivation of Arecanut and Pest Management” neih a ni a, Chief Minister Pu Lalduhoma chu khuallian niin he training hi a hawng a, LRS & WC Minister Pu Lalthansanga chu khual zahawm a ni.

Chief Minister Pu Lalduhoma chuan thu a sawi a, kuhva chu kum 2019 atanga khan Land Resources, Soil & Water Conservation Department kutah sorkarin a dah a, Department chhinchhiah danin Mizoram pumah kuhva huan hi Hectare 67,380 vel a zau a awm mek a, nikum 2025-2026 chhung khan Mizoram puma kuhva tharchhuah zat hi Quintal 5,12,000 vel niin an chhut a ni, a ti. CM chuan India rama kuhva thar tam lamah pangana dinhmun Mizoramin a luah thei chu lawmawm a tih thu a sawi a, eizawnna atana Kuhva huan siam duhte tan Sawrkarin kawng a hawng mek tih sawiin, Banakaih Handholding Scheme leh CM Special Package hnuaiahte dilna thehluh theih reng a ni, a ti.

Khuallian chuan kuhva chingtuten kuhva huan enkawlna tur mamawh hrang hrang an nei tih sawrkarin a hriatpui a, kuhva tam enkawlna tur damdawite, fertilizer-te, tuizem-te, pipe leh link road-te an mamawh a, hengte hi sorkar-in a tahtawlin a ngaihtuah zel a ni, a ti a. Tunah hian LRS & WC Department hnuaia thlai bik heng Kuhva, Rubber leh Hmunphiah huan panna kawng (link road) siamna tur NABARD leh SASCI sum Vbc.27.66 hmuh tawh a ni a, avaiin km 170 a thui link road hmun hran hranah laih tura ruahman a ni, a ti.

Carbon Trading Agency /Carbon Aggregator thawhpui turte zawngin inbiakna neih chhoh mek a ni tih sawiin, beisei anga thil a kal theih chuan Kuhva huante, Rubber huante leh Coffee huan atangte a Carbon Credit an thawhchhuah atangin huan neituten sum thahnem tak an la lut thei dawn tih CM chuan a tarlang.

Khual zahawm LRS & WC Minister Pu Lalthansanga pawhin thu a sawi a, kuthnathawktute chu sawrkar VIP te an ni, a ti a, an thawhrah an seng theih nan sawkarin theih tawp a chhuah thin, a ti.

Mizoram Kuhva Chingtu Pawl (MKCP) President Pu C. Laldina pawhin thu sawiin, kuthnathawktute ngaihsaktu sawrkar an nei chu lawmawm a tih thu a sawi.

Chawhnu lam training-ah Dr. Rebecca lalmuanpuiii, Subject Matter Specialis( Agroforestry) chuan “Scientific Cultivation Arecanut” tih thupui hmangin zirtirna a pe a ni.

Kuhva chingtute tana training hi October ni 23, 2026 hian Lunglei ah buatsaih a ni leh ang.