Kakichhuaha tui hri nia hriat lêng mêk vangin mi 5 an thi tawh

12 Nov 2025: Kakichhuaha tui hri nia hriat lêng mekah Lawngtlai Bawrhsap Pu Donny Lalruatsanga leh Dr. Lalmuanawma Jongte, Sr. CMO – ten DC Office Chamber-ah hmalak dan tur an sawi dun.

Pu Donny Lalruatsanga chuan tui hri nia hriat lêng mêk avanga nunna chan hial an awm chu pawi a tih thu tarlangin, chak taka hmalak a tul hle a ti a. Hri leng mek a darh lohna hmalak a nih tur thu a sawi a. Mipuite chi ai lo tura chahin, tihrem ngei a nih a beisei thu a tarlang.

Dr. Lalmuanawma Jongte, Sr. CMO, chuan report pein, November ni 4 atang khan case neih tan a nih thu a tarlang a. November ni 11 khan Medical team-ten Kakichhuah hi tlawh nghalin, investigation – kalpui nghal a ni, a ti a. Tui sample lak niin, ZMC& H lamah endik mek a nih thu sawiin, Salachhuah (Myarmar) lam atanga hri hi lo luta an ngaih thu a tarlang a. Kum 5 – 63 inkarte endik atangin tun dinhmunah he hri vei hi mi 27 an awm a, a kaihhruaina hnuaiah Rapid Response Team din tawh niin, Health Worker pakhatin a awmpui mek tih a sawi.

Hmalakna tur hrang hrang sawi zingah, tui tihthianghlim, a veite enkawl hmâ, faina leh thianghlimna chak taka kalpui ni se an ti a. Kakichhuah leh Salachhuah inkalpawhna kawng chu dan lailawk ni se tih a ni a. Kakichhuah chu kar khat chhung atan ‘containment area’ ah puan ni se, Medical duty, Election duty, leh Emergency thilah lo chuan tumah luh leh chhuah phal loh ni se an ti a ni. Damdawi tul ang angte chak taka pek ni se, hemi chhung hian Sr. CMO kaihruiana hnuaiah zirchianna chak taka kalpui ni se an ti bawk.

Kakichhuaha tui hri nia hriat lêng mêk vang hian mi 5-in nunna an chan tawh a ni. (DIPR)