Mizoram Baptist Kohhran chuan BCM hian kumtina an tih dan ṭhin angin Beihrual inkhawm hi September ni 1 aṭanga ni 10 zan thleng khan BCM hnuaia tualchhung Kohhran tinah hman niin Beihrual thu zir atan “Lalpa lo kal lehna” Rev. C.Lalrochama ziak chu an zirho a ni. Beihrual thuzir an hman zawh hnuah September ni 11.2023 zan aṭang khan tualchhung Kohhran Committee ruahman angin Crusade leh Salvation Camping-in hun hman chhunzawm mek a ni a. BCM Recognised Evangelistic Team zinga mite chu tualchhung Kohhran tam ber hian rawngbawl tura an sawm laiin tualchhung Kohhran ṭhenkhatah chuan Bialtu Pastor leh Pastor Pension tawh sawm an awm ve bawk.
Hetihlai hian Mizoram Presbyterian Kohhran pawhin September ni 1.2023 aṭanga Beihrual thuzir leh Nilaizan thupui zirhona hun kalpui paha Hapta ṭhen bik hrang hrang an hman zawh hnuah Presbyterian tualchhung Kohhran tam zawkah chuan vawiin (Sept ni 19, 2023) aṭangin Camping hmangin hun hman chhunzawm a ni. Tun dinhmuna Crusade leh Camping Programme la buatsaih lo tualchhung Kohhran tam zawk pawhin an remchan dan angin tunkar chhung hian Camping emaw Crusade emaw hmangin hun an hmang tlangpui dawn a, hengah te hian Kohhran tam zawk chuan Synod Revival Team te rawngbawlna nei tur hian an sawm a ni.
UPC (NEI) leh UPC (MZR) te pawhin September thla chawhma lam zawng kha Beihrual thuzir hun atan hmangin zantin Beihrual inkhawm an nei ṭhin a, Beihrual thuzir inkhawm zawh hnuah erawh Programme dang ruahman awm lovin inkhawm hun pangngaia inkhawm kalphung pangngaiin hun an hmang chhunzawm a ni.
Church of Faith (Rinna Kohhran) te pawhin September thla chawhma lam zawng khan Beihrual Programme hmangin hun an hmanga zantin Beirual thuzir zirin an inkhawm ṭhin. Beirual thuzir inkhawm zawh hnuah erawh a bika programme hranpa siam zui awm lovin inkhawm hun pangngai angin hun an hmang mek a ni.
Salvation Army pawh-in Beihrual thuzir zir zovin, tunkar chho-ah Crusade leh Camping buatsaihin hun an hmang chho tan dawn bawk.
