Kum tlinglo inneih tihtawp campaign

Kum tlinglo inneih tihtawp campaign

16 Nov 2026: Zirtawp ni liamta khan Bungtlang South-ah Kum tlinglo inneih tihtawp Campaign hun hman a ni a. He hun hi Pi Flora Laltanpuii, Deputy Director (Women) leh Member Secretary, Mizoram State Commission for Women ni bawk chuan khuallian niin a hmanpui.

Khuallian Pi Flora Laltanpuii chuan Mission Shakti kum tlinglo inneih (Child Marriage)-in a nghawng tha lo hrang hrangte sawiin, The Protection of Child Marriage Act, 2006 hnuaiah khap tlat a nih thu leh bawhchhiate tan hremna na tak a awm thu a sawi a. Kalkhawm zawng zawngten Kum tlinglo inneih tihtawp anih theihna turin intiamkamna an nei bawk a ni. Hemi rual hian Health & Family Welfare Department leh Beti Bachao Beti Padhao (BBBP) scheme kaltlanga nu naupaiin nausen hrisel zawk damdawi Ina an hrin theihna tura ruahman ‘Project Genesis’ sawizauna a nei a. Project Genesis hnuaiah hian nu naupai te Sub-Centre-ah an inziaklut vek tur a ni a, a  hun takah vaccine an lak hnuah damdawi In ngeia nau an neih chuan nu leh nausen mamawh tanpuina tum li pek an ni dawn a ni.  Mission Shakti hnuaia hmeichhe dinhmun chawikanna leh venhimna scheme hrang hrangte sawifiahin, sawrkarin hmeichhia leh naupangte tana scheme tha tak tak a ruahmante chu ngaihvena chhawr tangkai deuh deuh turin kalkhawmte a chah bawk.

Campaign inkhawm hi Dr. K. Vanlalhruaizela, CDPO Bungtlang South chuan kaihruaiin, kalkhawmte lawmna thu a sawi a.Pi Lalmalsawmi, District Programme Officer, Lawngtlai chuan programme hlawhtling tak hman a nih theih avanga lawmthu sawiin hun a khar.

He programme hi State Hub for Empowerment of Women (SHEW) leh District Hub for Empowerment of Women (DHEW), Lawngtlai te tangkawpin an buatsaih niin, Bungtlang South khua a NGO hrang hrangte, VC, MZSRLM, zirlai naupang leh vengchhung nu leh pate an tel kim hle a ni.

Share Post:

Comments (0)

No comments yet. Be the first to comment!

Leave a Comment

Boost Your Business with Cutting-Edge Marketing Solutions Today

Your ad here
Image