16 Nov 2026: Vawiin khan National Commission for Women leh Mizoram State Commission for Women (MSCW) tangkawpin an buatsaih, Consultation on “The Mizoram Prevention of Immoral Traffic Rules,1996” chu Planning & Programme Implementation Department (RDB) Conference Hall-ah neih a ni a. Social Welfare, Women & Child Development Minister Pi Lalrinpuii’n khuallian niin hun a hmanpui.
Minister chuan hmeichhiate himna leh an dikna humhalh kawnga dan awmte tha taka hman a pawimawh, a ti a. Mizo hmeichhiate tana dan kan neih mekte zirchianna hun tha tak buatsaih a nih chu lawmawm a tih thu a sawi a, khualzin pung zel hian ram tana hlawkna a thlen theih rualin, Mizo hmeichhiate himna ngaihpawimawh tul a tih thu a sawi a ni.
Immoral Traffic (Prevention) Act-in nawhchizawrhna leh a kaihhnawih thil tih a khap angin, chutiang thil tihpuitu leh hmeichhia zawnsaktute pawh dan anga hrem theih an ni a. Nawhchizawrhna hmun (Brothel) siamtute leh, mahni in leh hmunhmate chutiang atana hmantirtu chu, na taka hrem theih an nih thu a sawi bawk.
Minister chuan dan kengkawhtute zawng zawng hian zirchianna zau zawk neih a, Mizorama hotel leh homestay kalphungte pawh enfiah a tul thu a sawi a. Vawiina zirhonaa thu ngaihtuahte hi, hmeichhe himna atana a pawimawhzia hriain, chak taka bawhzui turin kalkhawmte chu a ngen a ni.
Minister chuan hmeichhiate himna hian Zoram nuam a siam a, Mizo hmeichhiate himna leh an dikna humhalhna kawnga tih theih leh bawhzui theih apiangah theihtawp chhuah a inhuam thu a sawi bawk.
Special guest Women and Child Development Director, Pi Zoramthangi Chhangte chuan dan tha tak awm ringawt hi a tawk lo a, department leh institution hrang hrangte thawhhona te leh a tuartute humhalh leh enkawl danah te hian, dan hlawhtlinna a innghat tih a sawi a. Women & Child Development Department mawhphurhna pawimawh tak takte sawiin – chhanchhuahte himna tur hmun ngaihtuah te, damdawia enkawlna te, rilru lam inenkawlna te, counselling, zirna leh skill development bakah eizawnna kawng an zawh theihna tur puihna pekte a ni, a ti.
Vawiin zirhonaah hian sawrkar lama mi pawimawh tak takte an tel a, technical session hun hman a ni bawk.
Comments (0)
No comments yet. Be the first to comment!
Leave a Comment