Leiminna Tawipui South-ah YMA Sub Hqrs hruaitute an kal

16 July 2026: NH-54 Tawipui South khawchhunga leimin avanga harsatna thleng mekah Tawipui South tlawhin YMA Sub-Hqrs Lunglei hruaitute an kal a, tanpuina sum an pe.

He hunah hian Pu C.Lalrindika, Secretary chuan NH-54 in a paltlang khua a bik takin Thaizawl, Bualte, Thualtu leh Tawipui N & S te kum dangah pawh Mizo tlawmngaihna nen kawng ping avanga khualzin tangkhangte an lo tuam hlawm tawhna chu chhuan awm a tih thu leh midangte tana an hun leh tha leh an neih ang ang te an thehchhuak thin chu Mizo te min ti hmelthatu, Zoram chhung leh pawna media-ah pawh tun tuma tangkhangte an chhawmdawl dan chuan hmun a luah tih sawiin, hemi phena a kul a taia che YMA hruaitu leh member-te zahna chibai an buk tih a sawi.

DC leh a staff te hmalaknaah YMA Sub-Hqrs Lunglei chuan lawmthu a sawi a, Group YMA, Jt. YMA leh Branch hruaitute bakah VC-te’n theih tawp a tangkhangte tana hma an laknaah YMA Sub-Hqrs Lunglei hmingin lawmthu a sawi bawk.

YMA Sub-Hqrs Lunglei aiawh hian Secretary bakah Pu H. Lalhmingthanga (AS), Pu K. Vanlalhruaia, Treasurer, Tv. Lalrimawia leh Tv. C. Lalsangzuala SEC te leh Tv. Mesak Lalrintluanga leh Pu Lalmuanpuia te an kal a ni.

Chhim lam leh Hmar lamah lirthei tang 200 dawn awmin, mihring 300 bawr vel tang an awm a, Jt. YMA Tawipui ruahmannain hmun hnihah eirawng bawl a ni.

District thuneitute leh YMA hruaitute bakah VC leh Jt. YMA, Group leh Branch-te’n kawng tlang huna chet lak dan tur leh dan leh thupek kaihnawihte an sawiho bawk.