Mizorama la awm ngai lo Remna Kût (Peace Fest) 2025 chu

Tourism Department leh Khawhai khawtlangin an buatsaih, Mizorama la awm ngai lo, Remna Kût (Peace Fest) 2025 chu ni hnih chhung Khawhaia neih a nih hnuah October 25, 2025 (Inrinni) khan a tiak ta.

Peace Fest 2025-ah hian kum 133 kaltaa Dawn pasalthate leh Lal Nikuala khua Chawngtlai pasalthate inbeihna hmun, Pawi thah kawn, Khawhai tlangah inremna saui tan a ni a. Saui tan tur hian Myanmar Dawn khua atangin palai 30 chuang an lo kal a, pasaltha hruaitute ve ve – Dawn pasaltha Ralbila leh Nikuala pasaltha Chawngluta thlah te’n inremna hi an siam a, pasaltha Ralbila thi pawh a thlahte hnenah pêklêt leh a ni a, Dawn khaw lamah an hawn hnuah hun remchang hmasa berah Aizawl Museum-a dah tura ruahman a ni. Festival chhung hian programme hrang hrang – Peace concert, Nghakuai chiah leh cultural programme hrang hrang neih a ni a; naupang intihhlimna chi hrang hrang buatsaih a ni bawk.

Peace Fest-ah hian Adviser to CM Pu Lalmuanpuia Punte MLA chu khuallian a ni a. Khuallian chuan Peace Fest buatsaih chu tha a tih thu sawiin, “Remna leh Muanna hi a hlu em em a, Mizoramin remna leh muanna hlu tak kan neih te khualzin hip nana hman nachang in hria hi in fakawm hle a ni. He Peace Fest hi Zofate’n remna leh muanna hlut zia kan hriat lehzual theih nana hmanraw tangkai tak a nih ka beisei. Festival buatsaih tura Khawhai khawtlang leh Khawhai Khawchhuak Welfare hruaitute inpekna a fakawm hle a ni,” a ti bawk.

Khualzahawm Pi R.Lalrodingi, Tourism Dept Director pawhin mikhualte lakah that chhuah lehzual zel turin Khawhai mipuite a fuih bawk a. Peace Fest buatsaih leh zel turah pawh Tourism Dept lam pawhin theihtawp an chhuah zel tur thu a sawi bawk.

He Peace Fest 2025 hi kumtin buatsaih tura ruahman a ni.