Mizorama zirna siamthatna tur hmachhawpte kalpui dan tur rel

22 Aug 2026: Nimin chawhma dar 11:00 khan Mizoram Education Reforms Committee (MERC) thutkhawm vawi 17-na chu an Chairman Dr Vanlalthlana Minister hovin Directorate of School Education Committee Room ah neih a ni a. Mizorama zirna siamthatna tur hmachhawp hrang hrang kalpui dan tur an rel.

Sawrkar leh Kohhran thawhhona atanga school enkawl dan tur Public Private Partnership (PPP) atana rawtna an pawm tawh tihhlawhtlin dan tur leh ruahmanna (Implementation Schedule) an duang a.  An ruahman ang chuan Sept – Nov 2026 chhung hian Sawrkarin tih tur hrang hrangte tiin, December 2026 ah chuan School thlang fela Memorundum of Understanding (MOU) te tih feltum ni se, an ti a. Kum 2027 Academic Session tan hunah PPP mode School ten hna an tan ve theih nan School inhlan felna (Hand over to Partner) February 2027 ah neih tum ni se, an ti. 

Draft Mizoram Education (Transfer and Posting of School Teachers ) Rules, 2026 pawh hman theih tura pawm tawh chu siam that ngai nia langte siam that a ni a. Sawrkara dah luh hmain Service Association te leh helam kaihhnawih pawl hrang hrangte  ngaihdan leh thlir dante enho leh ni se, an ti.

Chumi zawhah chuan sawrkarin dan ang taka kalpui turin thil tulte a buatsaih ang a,  hun remchang hmasa berah Cabinet Agenda turin  ruahman tum ni se, tiin an rel a ni.