‘National Tribal Livelihoods Summit, 2025’ ah Minister Pi Lalrinpuii khualzahawm
21 Feb 2025: Vawiin khan Dr Ambedkar International Centre, New Delhi-ah Bharat Rural Livelihoods Foundation leh Axis Bank Foundation huaihawt ‘National Tribal Livelihoods Summit, 2025’ chu Pi Lalrinpuii, Social Welfare & Tribal Affairs and Women & Child Development Minister chuan khualzahawm niin a hmanpui.
SWTA, WC&D Pi Lalrinpuii chuan Mizoram chu state kilkhawr bera awm ni mahse ramah theihna tam tak a awm thu sawiin, ruahmanna ṭha a awm chuan kut hnathawka eizawngtu Mizote chu hnam taima leh rinawm tak an nih thu sawiin, khawkar kawngah pawh Nghahloh dawr (shop without shop keeper) hun rei tawh tak aṭanga chin tawh a nih thu a sawi bawk.
State dangte ruala Mizoten hmasawnna an hmuh ve ngei theih nan ṭan lakpui turin a sawm a, Mizoram awmna a kilkhawr avang leh population a la tlem avangin CSR fund bakah funding agency lian lo lut an la tlem em em a, international border neih a nih avangin state dang aiin harsatna tam tak hmachhawn a tul tiin, Mizoram hmasawnna tur atana thawhhopui atan inhawng takin he Summit-a kalkhawmte chu a sawm a ni.
He Tribal Livelihood Summit-ah hian Funding agency lian te, PSU lam bakah International development sector-a thawkte te leh Central Ministry leh state hrang hrang aiawhte an tel.
Kum 2013 khan Central sawrkarin BRLF hi Autonomous society ni a, Tribal ten eizawnna ngelnghet an neih nana thawk tura a din niin tunah hian Tribal hnam awmna state 10-ah State sawrkar nen ṭangdunin hna an thawk mek a. Central fund bakah CSR fund hmangin Foundation lian tak tak nen an thawkho a, Mizoramah pawh lo lut ve turin sawrkarin ruahmanna a siam mek a ni.
