Chawimawi phu nia hriatte chawimawi

12 Oct 2026: Vawiin chawhma dar 11:00 khan Lunglei District Congress Committee (LDCC) chuan LDCC Bhawan-ah Lunglei District atanga mi hmingtha nia an hriatte chawimawina hun an hmang.

Chawimawina inkhawm Pu Eric R.Zomuanpuia, LDCC Treasurer kaihhruaiah LDCC President Pu R.Lalnunthara chuan, Zofate hian ngaihhlut tur dik kan hriata chawimawi phute kan chawimawi a ngai tih hi Lunglei District Congress Committee ngaihdan a ni tiin; midang chawimawi phute pawh an lo chawimawi tawh thin thu a sawi.

Hetiang a chawimawi phute kan chawimawi hian midangte tan chona nasa tak a siam kan beisei a ni tiin, vawiina an chawimawi takte; a bik takin zirtirtu hna thawktute an ropui a tih thu leh infiamna lama chawimawi phu an chawimawi takte pawh an tum ruhna leh thawhrimna fakawm a tih thu Pu Mathara chuan sawiin, Leitlangpui leh zofate ti hmingthatu an ni a ti a, LDCC-in chawimawina a hlan zawng zawngte an kal zelna turah duhsakna a hlan nghal a ni.

Chawimawite atangin Pi Lalnunmawii chuan, LDCC ten an chawimawi theihna chhan chu Pathian khawngaihna avang leh Sikula a thawhpuite nen thawhhona tha an neih vang a ni a ti a, LDCC-te’n chawimawina an hlan chu thinlung taka a lawm thu a sawi.

Pu C.Lalhmingmuana chuan LDCC ten hetiang hun an buatsaih chuan a barakhaih thu leh lawmawm a tih thu sawiin, Sikula a thawhpuite vanga chauh a chawimawina dawng ve thei mai a nih thu a sawi. Congress Party chu an thuvawn, ” Rorelna dik chu lui angin luang sel, felna chu luipui kang ngai lo angin luang rawh se.” Amosa 5:24 chu an inhmeh hle nia a hriat thu tarlangin midangte chawimawi ngam Congress Party fakawm a tih thu a sawi.

Chawimawina inkhawmah hian Pu Thanghmingliana Renthlei, LDCC G.S in chawimawite chanchin tlangpui a chhiar chhuah hnuah chawimawina thuziak Party hruaituten an hlan a ni.

Vawiina LDCC in chawimawina an hlan te hi Pi Lalnunmawii, Headmistress Electric Veng High School, National Teachers Awardee 2026, Pu C.Lalhmingmuana Salem Veng, Principal BHSS, State Teachers Awardee 2026, F.Lalthantluangi, Kanghmun South, India Hockey Player Asian Games Gold Medalist 2026, F.Lalbiaksiami India Junior Hockey Player Asian Junior Gold Medalist leh B.Lalpekhlua Venghlun, National Arm Wrestling Junior Category Gold Medalist te niin, lawmpuina thuziak an hlan.

Party mipuite bakah sawm bik thahnem tak, Sports Association hruaitute leh Media-te’n an telpui a ni.