18 Nov 2026: Mizoram Lokayukta Act, 2014 bung 47-nain a phut angin Pu Lalmalsawma, IAS, (Rtd.), Chairperson, Mizoram Lokayukta chuan vawiin khan Larsap, General Vijay Kumar Singh hnenah Mizoram Lokayukta Annual Report Pasarihna a thehlut. Annual report hian April ni 1, 2025 atanga March ni 31, 2026 inkar a huam a, Mizoram Legislative Assembly thutkhawmah pharh a ni ang.
He hunah hian Mizoram Lokayukta Chairperson Pu Lalmalsawma, IAS (Rtd.) leh amah tawiawmtu Pu Lalsanglura, MPS (Rtd.), Member leh Pu Joel Joseph Denga, MJS (Rtd.), Member (Judicial) te chuan Lokayukta hmalakna leh hnathawh dan tlangpui bakah, thubuai chinfel tawh dante, dik leh langtlang zawka rorelna kalpui zel dan turte Larsap hi an hrilhfiah a ni.
Mizoram Lokayukta annual report pasarihnain a tarlan dan chuan kum 2025-2026 chhung khan thubuai lut thar 18 a awm a. Case 15 te preliminary inquiry tura ziahluh niin, Anti-Corruption Bureau hnehah case 3 leh Inquiry Wing, Mizoram Lokayukta hnehah case 12 pek a ni a. Hemi hun chhung hian thubuai 12 chinfel/khar a ni.
March 2019-a Lokayukta din a nih atanga vawiin ni thlengin thubuai 101 ziahluh tawh niin, heng zinga 74 te hi preliminary inquiry tura ziahluh a ni a. Chhuichian (investigation) turin case 37 ziah luh a ni a. Prosecution tura Court-a case thehluh tawh 17 awmin, case khar tawh 52 a awm bawk.
Eiruk thubuai hi engtik lai pawhin a thlawn vekin Mizoram Lokayukta Office MINECO-ah lehkha pheka ziakin emaw, email – Mizoram.lokayukta@mizoram.gov.in ah thlen theih a ni a. Mahni nihna tilang duh lote chu an nihna thup sak thin a ni a, amaherawhchu Lokayukta lam atanga biakpawh theihna tur erawh dah tur a ni.
Comments (0)
No comments yet. Be the first to comment!
Leave a Comment