Solidarity March neih a ni

23 July 2026: MZP Hqrs Lunglei buatsaihin NEET Paper leak, CUET-UG delay duhlohna leh India rama Education Reform a awm theihna atan vawiin chawhma lam khan Solidarity March neih a ni.

Solidarity March hi chawhma dar 11:00 ah Old Tennis Court Venglai Lunglei atangin tan a ni a, kawngzawh tura innghahkhawmna hmun Old Tennis Court-ah hian inkhawm tawi neih a ni.

H.Lalhmingmawia, President MZP Hqrs Lungleiin a kaihruai a, helai hmuna kan punkhawm chhan hi a lungchhiat thlakin a thinrim thlak a, huau huau thila kal kan ni lo va, dikna kan duh vang a ni a; dikna hmachhuan zel kan tum ang a ti.

Lunglei Gov’t College Student Union aiawh leh Gov’t J.B College Student Union aiawhte’n thu sawiin, dikna humhim tlattu dan kan nei a, diklohna hrem theitu dan kan nei bawk a, dikna hnuaia intluk tlanna hi kan duh ber a ni an ti.

Zirlaite hian kan kalkhawm chhan kan hriat chian a tul a. Kan zirna kalphung siamthat duh vang leh zirlaite hmakhua atana thil diklo tak thleng hi kan duh lo va, chuvangin zirlaite hi exam fair zawk kalpui leh zirna kalphung siamthat anih theih nan kan au zel dawn a ni, an ti.

Old Tennis Court a hun an hman zawh hian kawng zawhin, NEET Exam zawhna leak an duhloh thu leh Zirna kalphung siamthat an duhna thuziak hrang hrang kengin, Union Education Minister bang tura an duh thu an aupui bawk.

An ruahman lawk ang chuan D.C Office kawtah tawpna an siam ang.