19 Nov 2026: YMA Sub-Hqrs Lunglei hnuaia Road Monitoring Committee te chuan nimin khan ATL Road siam mek a hmunah an endik.
Road Monitoring Committee te hi an Chairman Pu K Lalfakzuala hovin mi 8 an thawkchhuak a, EE, PWD Road-II Lunglei Division, SDO, JE PWD Road-I&II leh Contractor SLT Infra Pvt. Ltd. aiawh in a neitu Pu Brajesh Tunsial leh Engineer-te’n an lo dawngsawng.
SDO PWD Office Haulawngah inkawmhona hun hman a ni a, Pu Faka, Chairman Road Monitoring Committee chuan kawng siam hna a muang lutuk chu an ngaimawh thu a sawi a. Kawngchhia avanga chhimlam mipuiten kan tawrh nasat dan hrang hrang a sawi a, Contractor te hnathawh dan pawh beitham ni a an hriat avanga lungawithlakloh a tih thu a sawi a, chuvangin hna hi a rang thei ang bera thawh zawh a nih theih nan theihtawp chhuah turin a ngen a ni.
Tin, hna muang chung pawha a quality a that loh chuan awmzia a nei dawn lo tih sawiin, huntiam chhunga thawk zo tura ngen ruala, hmanhmawhna remchanga hmanga kawng siam quality tihchhiat phahlo turin Contractor te a hrilh a ni.
ATL Road siam ṭan anih atang hian Road Monitoring Committee te hian tum li an tlawhna a ni tawh a, SLT Infra Pvt Ltd ten an hna hmuh hmasak ber Mausen to Pukpui (Package 1&2) hi an hna a muan em em laiin, Haulawng bul to Mualthuam N leh Sekhum (115-129.22) inkar pawh Restricted Tender in SLT kuta hlan mai turin tunah hian sawrkar in hma ala mek a, Christian Hospital Serkawn to DIET thleng SLT kutah pek a ni a, AOC to 3 Gate pawh SLT te kutah bawk hlan leh tum a ni. Heng avang hian Pu H. Lalhmingthanga Secretary Road Monitoring Committee chuan khawl, hmanrua leh hnathawktu mihringte pawh hna a chakna turin a tam thei ang ber indah turin SLT te a hrilh a ni.
Pu Brajesh Tunsial, Owner SLT Infra Pvt Ltd chuan ruahtui tlak avanga an hnathawh theih loh dan leh hmanraw lakkhawmah pawh harsatna an neih phah thu sawiin, an labour te pawh Puja chawlh hmanga an haw hlawm thu sawiin, YMA lamten, “Pakage 1&2, (Mausen to Pukpui) Kum 2027 April thla ral hma, hun tiam chhungin kawng siam hna chu in zo thei ang em?” an tih chu an Contract Period, April 2027 ral hma ngei a an zawh tur thu a sawi.
Haulawng thlenhma atanga Mualthuam N to Sekhum inkar hi Agreement la sign lo mahse kawngchhe zual lai te lirthei tana tlan nuam deuh a an siam tur thu a sawi bawk.
Lunglei Town chhung khawih ṭan anih pawhin ATL Road hnathawh hi kan chawlhsan dawnlo, hnathawktu mihring hi tun dinhmunah mi 90 chuang kan nei a, mi 40 vel lo thlen belh tur kan nei tiin Pu Brajesha chuan a sawi bawk.
EE PWD Road-II Pi Mahmingi chuan YMA ten an hnathawh an enpui chu lawmawm a tih thu a sawi a, he kawng hi tha tak leh chak taka siam anih theih nan engtiklai pawh a vilpui reng turin YMA te chu a sawm a ni.
Road Monitoring Committee te chuan Sekhum – Kanghmun S (15 kms) kawng, PWD Lunglei atanga Estimate thehluh vek tawh, tun thlenga Tender loh a la awm chu rang taka Tender a nih theih nana hma la turin Sawrkar an ngen a, Chief Minister hnenah pawh lehkha an lo thehlut tawh bawk a ni.
YMA Sub-Hqrs Lunglei chuan ATL Road hi mipui ta a nih avangin tha taka siam a nih theih nan a vil reng dawn tih an sawi a ni.
Comments (0)
No comments yet. Be the first to comment!
Leave a Comment