Zirtirtu tha award dawngtute hnenah lawmpuina hlan

08 Sept 2026: Vawiin chawhnu dar 1:30 khan MZP Hqrs Lunglei chuan National Teacher 2026 Awardee Pi Lalnunmawii Headmistress Gov’t Electric Veng High School, Lunglei hnenah lawmpuina an hlan a, he hun hi Pu H.Lalhmingmawia President MZP Hqrs Lunglei chuan a kaihruai a ni.

Gov’t Electric Veng H/S-a lawmpuina hun hmannaah hian MZP Hqrs Lunglei President chuan kum 2026 chu Lunglei tan kum ṭha anih thu sawiin, Lungleiin State Teacher Awardee leh National Teacher Awardee kan nei thei chu MZP chuan lawmawm an tih thu a sawi a. Zirlai naupangte chuan entawn tur leh entawn tlak zirtirtu an nei chu an vanneih thu leh zirna kawngah chhawr tlaka zir turin zirlai naupangte chu a fuih a, Mizoram hmun hrang hranga zirlaite el thei tur khawpa zirna ngai pawimawh turin a fuih nghal bawk a ni.

National Teacher 2026 Awardee Pi Lalnunmawii pawhin thu sawiin, National Teacher Award chu mahni mimal tumna chauha dawn theih anih loh thu leh zirlaite leh zirtirtute thawhho ṭhatna avanga dawn anih thu a sawi a. Sorkar sikula zirtirtute chuan chona leh sawiselna nasa tak karah theihtawp chhuaha zirna hmasawnna atana an beih thu a sawi a ni.

Mizo Zirlai Pawl Headquarters: Lunglei chuan ni 5 September, 2026 (Inrinni) khan Mizoram State Award for Meritorious and Outstanding Teachers Awardee Pu C. Lalhmingmuana Principal Baptist Higher Secondary School hnenah lawmpuina hi an lo hlan tawh bawk a ni.