04 Feb 2025: PWD Minister Pu Vanlalhlana’n Election Model Code of Conduct bawhchhiaa an puhna chungchangah State Election Commission ah ngaihdam a dil a, EMCC bawhchhiat loh a intiam bakah video upload pawh delete tura hriattir a ni a, hemi atana a hmalakna hi ni 3 chhungin SEC ah thehlut tura hriattir a ni bawk.
SEC thuchhuah tarlan danin MNF General Headquarters-in Complaint a thehluh avangin PWD Minister Pu Vanlalhlana chu insawifiah tura hriattir a ni a, Pu Vanlalhlana chuan Model Code of Conduct (MCC) bawhchhe tura a tum reng vanga video clip chu siam anih loh thu leh, dan bawhchhiatna a ni tih hre lova, tihpalh a nih thu sawiin, ngaihdam a dil a, State Election Commission chuan thil awm dan hrang hrang chhuia a enfiah hnuah Minister-in a thil tih pha lova ngaihdam a dilna chu a vawikhat tihna anih avang leh ti tawh lo tura a intiam avangin pawmsakin a ngaidam a, Hei bakah hian Video Clip chu campaign naa ngaih theih anih avangin delete nghal turin a hriattir a. Hemi atana a hmalakna hi ni 3 chhunga State Election Commission-a theh lut leh tura hriattir a ni bawk.
Hetihlai hian MNF Party in complaint an thehluh tho Minister Pu Lalnghinglova Hmar chuan a insawifiahnaah Party mite hmaah Sawrkar hmalakna awm tawh sa leh hmalakna kal mek chungchang a hrilhfiah mai niin a sawi a, MCC chu party tinin tanhmun inang neia inthlan an hmachhawn theih nana siam a nih avangin a zahawm a, MCC-in inkaihhruaina hrang hrang a siamte chu tha taka zawm chhunzawm zel a tum thu sawiin SEC chuan a sawi ang ngeia fimkhur taka inthlan kaihhruaina zawm chhunzawm turin a hriattir a ni. (AIR)
