Ram leilung fate zahlohnaah ngai

03 Nov 2026: Mizo Zirlai Pawl Headquarters: Lunglei chuan thuchhuah siamin, tun hnaia social media platform hrang hranga Mizote dawt hmanga Chakma-in min ti mualpho nawn leh chu pawi a tiin a ram leilung fate zahlohnaah a ngai a, Surita Chakma intiin Youtube-a podcaster pakhatin a kawmnaa Mizote thu dik lo leh mawi lo taka min diriam hi MZP Hqrs. Lunglei chuan a enliam mai mai dawn lo a ni, a ti.

Mizoram leilung fa dik takte’n zawldawh taka Chakmate kan en laia hetianga thu dik lo hmanga a mualpho thei ang bera min chhuah leh thin hi MZP Hqrs. Lunglei chuan a ngai thiam lo hle a, tun chinah mikhual zawkte’n hetiang thu dik lova min beia min ti mualpho leh anih chuan MZP chuan a thiam dan angin hma a la zel dawn a ni, a ti.

MZP Hqrs. Lunglei chuan YMA Tlabung Branch-in ‘Tlabung leh a chhehvela thlamuang leh nuam ti taka zin kual thin Surita Chakma hi Tlabung leilung rap tawh lo turin kan hriattir a, amah anga dik lo taka Tlabung khua tihhmingchhiat tuma hma latute a tawp thlengin kan do zel ang’ ti a thuchhuah an siam chu an thlawp tlat tih an sawi bawk.

Chakmate’n dik lo taka min tih mualphona hrang hrangte hi Mizoram leilung fate chuan enliama ngaizam mai lo turin MZP Hqrs. Lunglei chuan Zoram mipuite a ngen ti a tarlang bawkin, kan ram leh hnam humhalhna kawngah kan thanharh zelna atana hmang tur leh kan ram leh hnamin chhan a ngaih pawha huaisen taka ke pen zel turin MZP Hqrs. Lunglei chuan Zoram mipuite a ngen tak meuh meuh a ni, an ti.