Ruihhlo donaah YMA-te mal beih tir mai lo turin chah

23 June 2026: YMA Lungrang South chuan nimin khan an Branch din champhaphak vawi 34-na Community Hall-ah an lawm.

He hun Pu Lalhunmawia, Vice President kaihhruaiah hian Khuallian Pu C.Lalrindika, Secretary, YMA Sub-Hqrs Lunglei chuan, YMA-in Kumpuanah Ruihhlo Do a puan leh tak avangin kan lo do sa reng ruihhlo do tura kan tha kan tihchaka tan kan lak a ngai hle a ni a ti.

Khuallian chuan, tunlaiin Lunglei khawpui leh a chhehvel mai nilo khawpui dangah pawh Chakma zu in kan tual lai a chiah hneh hle a ti a. YMA Lungrang South ten Lunglei leh a chhehvela chakma zu lut tur thahnem tak anlo man tawh thu sawiin, theihpawp chhuah zel tura sawmin Lunglei khawpui leh a chhehvel tana dai theutu pawimawh tak Branch an ni, a ti. Ruihhlo Do naah YMA-te mal beih tir mai lovin, Kohhran leh Khawtlang mipui bakah Sawrkar te nen kan tanrual zel a tul deuh deuh dawn a ni, a ti.

Ruihhlo donaah hian YMA chuan chhungkhat leh laina a nei dawn lo tiin, kan ram leh hnam humhalhna tura ruihlo sim tura a bawiha tangte pawh tan la tura fuihin, YMA ngenna leh duhdan zawm thei lova zuartu leh thenawm khawvengte hraite pawh Dan mit timim lovin YMA chuan a pal dan a thiam tih hre turin a chah bawk.

Pu Ricky Laldinthanga, Secretary chuan report pe in, kum 1992 June ni 25 khan din niin tun dinhmunah YMA member 411 an awm mek a ni. Ruihhlo dona kal mekah Zu fun – 5,000, Ganja- 1/2 KG kumin chhung hian an man tawh bawk.

Khuallian hi Pu Lalhminghlua, SEC member, Tv C.Lalsangzuala, SEC member, Nl.Vanlalrohlui, zaithiam leh Pu Lalmuanpuia YMA Sub-Hqrs Lungleite’n an tawiawm a ni.