SIR 2026: YMA-in document lem/diklo tam tak a awm an ti

01 Aug 2026: Special Intensive Revision (SIR) kalpui mekah YMA Sub Hqrs Lungleiin endik hna an thawh kal zelah, a thawh thumna atan nimin leh niminpiah khan YMA Sub Hqrs Lunglei hruaitute’n Tlabung bula khaw pahnih, Tiperaghat leh Tablabagh-te tlawhin; thil fel lo tam tak a awm niin an sawi.

YMA Sub Hqrs Lunglei hruaitute chuan Tiperaghat a mi 609 chuangte document enfel hna Official lamin an thawh chu thutchilhin ngun takin an enpui tih an sawi a. Document diklo leh document lem tam tak a awm tih sawiin, heng mite hi roll-ah thun an nih loh ngei an beisei tih an sawi.

Tablabagh-ah pawh document lem leh diklo tam tak a awm thu leh document lem siamtu pawh an hriat chhuah thu sawiin, document lem siamtu hian document lem a siam chu Rs 6000/- in a hralh thin thu YMA hruaitute hi a hrilh a. Sub Hqrs YMA hruaitute chuan document lem siam thintu chu ti tawh lo tura an hrilh bakah document lem siam kawnga inhnamhnawih dangte nen dan anga hmalak ngei anih an beisei thu leh YMA chuan a enzui zel dawn tih an sawi a ni.

Sub Hqrs YMA Lunglei hruaitute hi R.Lallawmkima, Finance Secretary hovin mi 4 an kal a, Tlabung Branch YMA hruaitute’n an tawiawm a ni.

Sub Hqrs YMA hruaitute chuan SIR kalpui mekah Tlabung SDO (C) leh Lungsen BDO-te inpekna leh thahnemngaihna fakawm an tih thu sawiin, SIR kalpui mek chu enzui zel an tum tih an sawi a ni.