SIR hearing: Marpara-ah document fel lo engemawzat endik

04 Aug 2026: Nimin khan Marpara-ah SIR Hearing neih a ni a, he hunah hian YMA Sub Hqrs Lunglei atangin Pu H. Lalhmingthanga Asst Secy, Pu K Vanlalhruaia Treasurer, Tv P Lalrimawia SEC, Tv R. Vanlalmuana SEC te bakah YMA Thorang Group hruaitute an kal. Thorang Constituency-a YMA Branch awm lohnaah YMA Thorang Group hnuaia Branch ten Hearing neih hi an telpui zel dawn a ni.

SIR Hearing hi RD Rest House-ah neih a ni a, Document fel lo Marpara S-1 ah mi 262 leh Marpara S-2 ah mi 330 vel enfiah an ni.

YMA Sub Hqrs hruaitute leh YCA Marpara hruaitute an inkawm nghal a. Pu Laltea Asst Secy YMA Sub Hqrs Lunglei chuan dan lova Mizoram lo luh tumte man chhuah kawngah theihtawp chhuaha YMA-te thawhpui turin a ngen a. Tun hnaiah Voter ID lem man chhuah a ni a, hemi chhuizelnaah pawh Marpara lam hi an fihlim loh thu hriat anih avangin hetiang siam thinte zawnchhuah kawngah theihtawpa hma la turin a hrilh a ni.

Pu K. Vanlalhruaia Treasurer pawhin thusawiin, BLO leh YMA-te theihtawp chhuaha lo thawhho pui turin a ngen a, Mizoram mi leh sa ni lote zawnchhuah kawngah pawh theihtawp chhuah turin a ngen a ni.

Document lem siam thin nia rinhlelh chhuizuina kal zelah hetiang thila inhnamhnawih ni a rinhlelhte koh niin, chhuizui ngai an awm thu YMA hruaitute chuan an sawi

Hearing neih kal mekah khaw hrang hrang BLO-te ram leh hnam tana an inpekna an fak thu YMA hruaitute chuan sawi.