Thisena hlawh chhuah Remna Thuthlung sawi dal phal lo

08 Aug 2026 : Ex-Mizo National Army Association (Ex-MNA) leh Peace Accord MNF Returness Association (PAMRA) te chuan vawiin khan Aizawlah thuthar thehdarhtute hmaah nunna tam tak leh thisena an hlawh chhuah Remna Thuthlung sawi dal an phal lo tih an sawi.

Coordination Committee on Ex-MNA & PAMRA chuan Mizoramin remna thuthlung a neih, a rah an seng mek chu nunna tam tak leh thisena an hlawh chhuah a ni tiin; Chief Minister Pu Lalduhoma’n sawi nep leh sawi dal a tum chu thinrimthlak an tih thu sawiin, remna thuthlung hmang thiam lo leh hmang ngam lo a nih chuan thuneihna a chan mek hi midang kutah hlan se tih hi hnam sipaiten an duhdan a ni tih an sawi.

Govt. Mizoram Law College zirlaite hmaa Chief Minister in Remna Thuthlung, Memorandum of Settlement (MoS) chu a hming dik pawh sawi duh lova ‘Memorandum of Agreement tih leh Memorandum of Understanding’ tia a sawi bakah “Mizoram sorkar leh India in an sign nilo in, MNF Party leh India sorkarin an sign a ni a, Mizoram leh India inremna nilo in, Mizorama party pakhat leh Home Ministry inremna a ni a, a ropui teh chiam lo ti a a sawi chu pawi an tih thu leh thu dik lo a sawi a ni an ti.

Hei bakah hian, Remna Thuthlung hmanga nemngheh ‘Inner Line Regulation’ pawh a duh hun huna Central sorkarin a paih theih, derthawng tak anga Chief Minister-in a sawi chu Mizoram leh hnam himna khawih thilah, huaisen taka mipuite hmaa ding tura beisei a nih laia, pawn lam atanga nawrna pawh awm si lova kan ram leh hnam inhumhimna kulh pawimawh tak ‘Central sorkarin a duh chuan min thiahsak thei’ tia a sawi hi vanduaithlak an tih thu an sawi bawk.
#ddnewsmizoram