UD&PA Minister hovin Lunglei khawpui hmasawnna tur sawiho

19 June 2026: Vawiin khan Mizoram sawrkara Urban Development & Poverty Alleviation (UD&PA) Minister Pu K. Sapdanga hovin Lungleia MLA-te, Lunglei Municipal Council (LMC) hotute leh UD&PA official-te chu Lunglei Convention Centre-a LMC Board of Councillors (BoC) Meeting Hall-ah an ṭhukhawm.

He hunah hian Lunglei khawpui chhung hmasawnna tur hna kal mekte thlir hovin, hmathlir leh hmachhawp hrang hrang an sawi ho.

Minister Pu K. Sapdanga chuan UD&PA hnuaiah Lunglei khawpui hmasawnna tur hna thawh mek leh hmachhawp ṭhahnem tak a awm tih sawiin, khawpui hmasawn nan Lungleia MLA-te leh LMC hotute nen engkim inhre pawh leh inlungrual tlang taka thawhho a pawimawh thu a sawi a. UD&PA hnuaia Lungleia hmasawnna hna thawh hrang hrang chu Municipal kuta awm tur leh sum thawk chhuak tur, sum pawh LMC suma lut tura duan a nih thu sawiin, a hlawhtlin hun nghahhlehawm a tih thu a sawi.

UD&PA hnuaia Lungleia hmasawnna hna lian zual kalpui mek leh hmachhawp awm vawiin ṭhut khawma tarlan zingah, State Priority Project (SPP) 2024–2025 hnuaiah Rs Nuai 1,750 hu project panga – Sazaikawna LMC Complex, Theiriata Transport Hub, Ramthar AOC-a Market Shed leh C. Ṭhuamluaia Mual bula Multi-Level Car Parking sakna tur leh Saikuti Hall chei ṭhatna tur te a tel a.

Urban Infrastructure Development Fund (UIDF 2025–2026) hnuaiah Lunglei Park chei ṭhatna tur leh vantlang inthiarna (pay and use toilet) leh kea kalna (footpath) siamna tur Rs Nuai 525 dah niin, SASCI Part-XB hnuaiah khawpui chhung hmasawnna hna hrang hrang 80 thawhna tur Rs Nuai 200 dah a ni bawk.

Lunglei Pulse hnuaiah Lunglei khawpui cheina leh hmasawnna ruhrel dinna tur hna hrang hrang 18 atan Rs Nuai 1,262 ruahman niin, SASCI 2024–2025 Part-XIII hnuaiah tuichhe paihna leh tuiluankawr Storm Drain & Drainage Network siamna tur Rs Nuai 250 leh SASCI 2025–2026 Part-V hnuaiah Rs Nuai 1,400 senga Theiriata Common Bio-Medical Waste Treatment Facility dinna tur ruahmanna te a awm bawk. (DIPR)