26 March 2024: Tunhnaia Aizawl New Market-a Tuikual Veng Nu V. Lalhmingthangi thattua puh Irene Lallawmzuali chu vawiin khan a chungthu ngaihtuah a ni.
New Capital Complex-a Chief Judicial Magistrate’s (CJM) Court ah Irene Lallawmzuali chungthu hi ngaihtuah a ni a, he hunah hian Tuikual South Khawtlang chuan an veng Nu V. Lalhmingthangi thlavang hauh leh tualthattuin a phu tawk hremna hmu ngei se an duh tih lantir nan an pung khawm a ni.
Kum 54 mi, Pi V. Lalhmingthangi hi March 16, 2024 zan khan Aizawl New Market-a a dawr kudamah Irene Lallawmzuali, Ramthar North chuan a that nia puh a ni a. A tukah a ruang hi hmuh niin a thattua puh pawh hi reilote hnuah man nghal a ni.
Tuikual South Khawtlang hruaitute sawi danin vawiinah hian vui tur mitthi pathum an nei a, amaherawhchu Local Council leh NGO thukhawm chuan an venga chhung tinte chu court-a kal tur leh chhiattawhnaa kal turte insiamrema a tam thei ang ber pungkhawm turin a sawm a ni. (AIR)
