Zirlai titha lawmpuiin, Legal Awareness programme hmang

30 July 2026: MSU Regional Hqrs Lunglei chuan vawiin chawhma dar 11:00 khan Convention Centre Lungleiah Zirlai ti tha lawmpuina hun leh Legal Awareness Programme an hmang.

Inkhawm hi Roluahpuia MSU Regional Hqrs Vice President in a kaihruaia, he huna khuallian Pu V.Malsawmtluanga MLA, HPC Vice Chairman ni bawk chuan, MSU Regional Hqrs Lunglei-in zirlaite tana an hmalakna hrang hrangte chu tha a tih thu sawi a. Lunglei hi Mizorama zirna hmunpui anih theihna turin Zirlai pawl hruaitu zawng zawngte nen theihtawp chhuah tlang zel ang u a ti a, sawrkar chuan zirlaite study tour neihna atana Rs Nuai 50 a dah thin chu Nuai 100 a dah tawh thu a sawi bawk.

Pu V.Malsawmtluanga chuan, khawvel thiamna leh theihna piah lamah finna tluantling neih theihna chu Pathian dah pawimawh ber hi a ni tih hre reng turin Zirlai kalkhawmte chu a chah a. Zirna avang ni lova kohhran leh khawtlanga inhman kan peih ta lo lutuk chu thalaite kan inenfiah a tul a, kan theihna leh thiamna te hi khawtlang leh kohhran hian a mamawh tih ngaihtuah thar a tul a ni, a ti.

He hunah hian Pu Z.D.Lalnunsanga, Advocate chuan zirlaite tana hriat tur pawimawh dan leh hrai zirtirna hun hmangin Uaptu B.Lalkhawngaihzuala President MSU Gen.Hqrs leh Lalthangliana President MSU Regional Hqrs Lungleite pawhin thu an sawi a, Rinhlui Tlumangin kalkhawmte zaiin a awi bawk.

MSU Gen.Hqrs President B.Lalkhawngaihzuala chuan, tunlaiin phai lamah hnamdang zirlaite’n Tribal Quota tihbo duhna an aupui leh mek a, he thil hi MSU chuan na takin a do dawn a, a tul anih chuan Jail tan thleng pawhin Mizo hnam tan kan ding dawn a ni, a ti. Zirlaiten aia upa zahna chang i hre thar leh ang u, a ti bawk.

Vawiina MSU Regional Hqrs Lunglei-in Zirlai ti tha lawmpuina an hlante hi tunhnaia MZU hnuaia result chhuaka Lunglei atanga top ten a lang mi 15-te niin, lawmpuina citation leh cake an hlan a ni.