25 Nov 2023: Zirtawpni zan atanga tan Mizoram Baptist Kohhran hnuaia Area Baptist Council 17 inkhawmpui neih mekah vawiin khan ABC hrang hrangah rorel inkhawm neih a ni.
ABC hrang hrang 17-ten vawiina rorel inkhawm an neihah hian tihdan thin angin rorel tan dawnah ABC Chairman nilai mek ten Chairman Elect hnenah Chairman mawhphurhna an hlan hmasa a, Chairman tharten rorel inkhawm an kaihruai a ni. Vawiina rorel inkhawmah hian ABC tinah Chairman Elect thlan hmasak niin Seceretary leh Finance report-te ngaihthlak a ni a, nikum ABC inkhawmpui leh tun ABC inkhawmpui inkara Kohhran Upa leh Rawngbawltu boralte sunna hun ABC tin rorel inkhawmah hian hman a ni bawk.
Vawiina ABC 17 rorel inkhawmah hian ABC huamchhung Pastor bial atanga thulut leh ABC Executive atanga thulutte ngaihtuah niin, an thu pass tam ber chu BCM rorelna sang ber BCM Assembly nakuma neih turah ngaihtuah turte niin ABC thenkhatah chuan Sawrkar khawih thil te pawh an pass bawk a, Lunglei South ABC rorel inkhawm BCM Lunglawna neihin ” BCM hian upa chawmtu neilote enkawlna hmun (Old Age Home ) din nise” tih an pass chu hriat theih chinah Kohhran khawih thu pass langsar zing a mi a ni.
ABC inkhawmpui neih mekah hian ABC tinah naktuk Pathianni zingah Kohhran Upa nemngheh inkhawm neih a ni anga, chawhnu lamah Sacrament inkhawm buatsaih niin Pathianni zan inkhawmah ABC Chairman kalchhuak theuhten Pathian thuchah an sawi ang. Naktuk Pathianni zan inkhawm banah ABC inkhawmpui hi an tiak ang.
BCM hnuaia ABC hrang hrang inkhawmpuiah hian mahni tha tih angin inkhawmpui thupui hrang hrang an nei a, thupui te hi ABC puipa ten iinkhawm apiangin an in sawi chhawk thin a ni.
Tun dinhmunah BCM hnuaiah hian Pastor bial 92-ah tualchhung Kohhran 680 awmin Member 1,76,404 an awm meka naktuk Pathianni zinga Kohhran Upa nemngheh turte mi 206 an ni.
