23 Jan 2024: Mizo Zirlai Pawl (MZP) chuan Mizoram Sawrkar-in zirtirtu ‘aikal’ lak titawp tura a hmalakna chu an thlawp thu sawiin; sorkar tha tichak tura tan lak an tum thu an sawi.
MZP Gen Hqrs Executive Committee vawiina Aizawl-a an pawl President Pu H.Lalthianghlima kaihhruaia thukhawm chuan ‘aikal’ lak titawp tura hmalakna chungchang hi sawiin, Education Minister Dr Vanlalthlana pawh chak taka hma la turin a ngen tih an sawi. MZP chuan February ni 10 ral hma ngeia ‘aikal’ la leh mahni post-a awmlo-te chu MZP Gen Hqrs-ah report turin a hnuaia Headquarters, Sub-Headquarters leh Branch te a hriattir a; February thla ral hma ngeia chingfela hmalak an tum tih an sawi a ni.
India leh Burma ramria zalen taka inkalpawh theihna ‘Free Movement Regime’ (FMR) \hiah tumna awm chungchang pawh meeting-ah hian ngaihtuah niin, Mizo hnam inpumkhatna leh inunauna tichhe thei tur a nih avangin a tawp thlengin dodal zel an tum thu an tarlang bawk.
Meeting-ah hian Bangladesh atanga an sahimna zawnga raltlante Central Force te’n an lo dan fo laiin Myanmar-a Zofa unaute tibuaitu ber Myanmar (State Administration Council) sipaite zalen taka an ralthuamte nen awlsam taka ramri an rawn kãn fo chu thalo an ti tih MZP chuan a sawi a, Civil mi tanpuina mamawha lo lut te laka an khawng em em laia buaina siamtu ber Burma sipaite a ngaihsak em em leh duat taka an thawnkir fo chuan mit a tikham hle tih sawiin, Mizoram-ah Myanmar SAC sipaite hi lo lut tawhlo tura an duh thu an tarlang. (AIR)
