Pu C.Lalrosanga MP (Lok Sabha) hovin Aug ni 28 khan Telecom Advisory Committee chu kumina a hmasa ber atan Aizawl-ah an thukhawm a. MP, he committee chairman ni bawk chuan BSNL, Mizoram hotute hmasawnna thu a sawipui a. Mipui rawngbawltu an nih angin vantlang harsatna leh mamawhte thlira an hmalaknate mipui hriattir zel turin a chah a ni.
Pu C.Lalrosanga chuan BSNL-in hotu thar Principal General Manager Pu Arumaya Dakua an nei chu lawmawm a tih thu sawiin, BSNL-in Mizoram puma inbiakpawhna titha tura hma an lak mekte leh ruahmanna an neihte chu tipuitling thuai se a duh thu a sawi a. Mizorama 4G service pekna tur hma lak mekte chu tun sawrkar kum ngeia tipuitling turin a chah a. Nakin zel atana 5G hmanga inbiakpawhna neih tuma hma la tura fuihin, sawrkar laipui lamah a tul dan anga hmalakpui a inhuam thu a sawi bawk.
BSNL hotute chuan Mizoramah telephone exchange 37 leh Landline connection 5,747 an la neih thu an sawi a. Broadband connection hman lai 2,094 an neih bakah mobile connection 2,60,814 an pek mek thu an sawi bawk. BSNL hian motor kawngpui, National Highway 81% leh State Highway 54% mobile in an huampha a. 4G hmanna tur atan district 11-ah Tower 60 bun an tum mek bawk a ni tih nimina TAC thutkhawmnaah chuan an sawi. BSNL hian fibre hmangin district pali ah FTTH connection 6,036 an pechhuak mek a, khawl leh hmanraw thar hmanga pek belh zel an tum bawk.
