Buhfai leh mamawh thil dang phurh luh kawnga harsatna tawh loh nan Supply Minister-in kawngpui dinhmun a enfiah
03 May 2024: Fur lo thleng turah kawngpui chhia avanga Mizoram-in buhfai leh mamawh thil dang phurh luh kawnga harsatna a tawh loh nan vawiin khan Supply Minister Pu B Lalchhanzova chuan kawngpui dinhmun a enfiah.
Supply Minister chuan kawngpui a en chhan sawifiahin, fur lo thleng turah Mizoram-in Buhfai leh mamawh thil dang a phurh luhna kawng chu a that a, buaina leh harsatna awm lo se an duh vanga tlawh a ni a ti a, PWD Minister Pu Vanlalhlana pawhin a hmuh dan report pe leh tura a chah thu a sawi bawk.
Minister hian Bairabi Rel chawlhmun atanga Buhfai phurh luhna kawngpui, Bairabi atanga Sairang inkar kawng leh Lei dawh te a en bawk a, Khamrang leh Buichali inkar kawng thawm that hna thawh zawh tawh leh Kawnpui leh Khamrang inkar thawm that hna PWD ten an thawh mek a tlawh bawk a, tun dinhmunah kawng chhe nasa zual lai te chu a thawm that hna thawh chhoh mek zel niin, a khuar nasa zual lai te chu hnawh mam deuh vek tawh a ni. (DD)
