Chhuanlam dang siama hna ti khaihlak tawh lo turin kawng siamtute hriattir

06 Nov 2026: Vawiin khan MZP Hqrs. Lunglei chuan ATL kawng siamtu SLT Company hotute Mausen-ah kawmin, an hnathawh dante leh an hmanraw neih dante an endik a, working season chhung ngeia an kawng siam chu zo hman turin an hriattir.

MZP Hqrs. Lunglei hruaitute chuan SLT Company hotute inbiakna an neihpuinaah hian ‘Diwali chawlh avanga kawngpui siam chawlh lailawk a ni’ tih chungchang an zawt fiah a. SLT lam chuan Diwali chawlh chu ni hnih chhung chauh anih thu leh hna khaihlak chhan chu bungrua duh khawp a awm loh avang leh fur ruah tuiin kawng leh kawr a hnawhte tifaia hun an hman thu an sawi a. Tunah chuan lung leh kawng siamna hmanruate inlak khawl tawh niin, April 2027 chhunga kawng siam chu zawh an inbeisei thu MZP Hqrs. Lunglei hruaitute hnenah hian an lo sawi a ni.

MZP Hqrs. Lunglei hruaitute hian SLT company chu mipuite mamawhna hria a an kawngpui siam chu tun aia nasaa uluk zawka thawh chhunzawm turin an hrilh a, an chhuanlam ber fur ruahtui tlak a zawh tawh avangin chhuanlam dang leh harsatna dang siama hna ti khaihlak tawh lo turin an hriattir a. Kawngpui an siam meka pothole tam tak awm; lei hmanga an hnawhte chu a pangngai zawka siam turin SLT Company GM hnenah MZP Hqrs. Lunglei hruaitute chuan hriattirin, lei hmanga an hnawhte chu GM chuan an hnathawkte a then fai tir nghal a ni.

MZP Hqrs. Lunglei chuan ATL kawng siam mek chu a chhawr ṭangkaitu mipuite tana a ṭha thei ber leh chak taka siam anih theihna’n a ṭul angin hma a lain a enzui zel dawn thu; thuchhuah siamin an sawi.