11 Nov 2024: Vawiin khan Secretariat Conference Hall-ah Chief Minister Pu Lalduhoma hovin PWD hmalakna review meeting neih a ni.
He hunah hian PWD Minister Pu Vanlalhlana leh PWD official-te bakah an hnathawh nena inkaihhnawihna nei department Environment, Forest & Climate Change Minister Pu Lalthansanga leh official te, Land Revenue & Settlement Minister Pu B.Lalchhanzova leh officials te leh Law department aiawhten an telpui a. PWD hnuaia contractor thenkhat pawh koh tel an ni.
PWD hian SASCI project 126, PMGSY hnuaiah project 53, NEC/ NESIDS hnuaiah project 29, NEPD/SEDP hmangin project 9, NABARD hnuaiah project 51, CSS project 8 CRF/ SCA hnuaiah project 10, MoRT&H hnuaiah projects 15, Bridges Works 21, Mixed head hnuaiah project 10 leh Sanction head 5054 (Road & Bridges) hnuaiah projects 192 te an thawk mek a. Heng an hna thawh mek zinga harsatna an tawhna projects te chipchiar taka tarlangin; a chin fel dan tur te pawh an ngaihtuah ho a ni.
Chief Minister hian kartin Department pakhat tal Review Meeting neihpui ziah tur hian ruahmanna a siam a. Tun tum hi a buatsaih tum hnihna niin kar hmasa khan Horticulture, PHE leh RD te chu a lo neihpui tawh a. Heng department te hian Chief Minister hova an hnathawh dan thlirhona, tun hmaa la awm ngai lo an nei hi tha an tih thu leh hlawk thlak an tih thu an sawi hlawm a ni.
Chief Minister hi Pu TBC Lalvenchhunga, Adviser to CM, Pu Vanlaldina Fanai, Commissioner & Secretary to CM, Pu Lalmalsawma Pachuau, Secretary, Planning, Pu Lalthansanga, Secretary, Finance leh official pawimawh dangten an tawiawm a ni.
This website uses cookies to improve your web experience.