08 Dec 2023: Mizoram Chief Minister thar Pu Lalduhoma chuan nimina sawrkar thar lakluh inkhawm zawhfel a nih hnuin Raj Bhavan Durbar Hall, Aizawl-ah thuthar thehdarhtute a kawm a; ni 100 chhunga an sawrkar hmalak dan tur a puang.
Pu Lalduhoma chuan sawrkar thar an din atanga kum khat chhung chu mipuiin anmahni dinhmun siam\hatna hun atan pe thei se an duh thu a sawi a, project lian leh thil pawimawh te kum khat chhung chuan an ti rum rum thei dawn lo, a ti.
Ni 100 lo awm tur chhung hian kuthnathawktute thlai thar– sawhthing, aieng, hmarcha leh hmunphiah te chu a minimun rate-in an lei dawn a ti a; CM, Minister leh MLA te’n IV Grade an neih theih chin tihtlem chu an hmalakna hmasa ber tur a nih thu a sawi. CM-in awmpui 8 an neih thin chu 4-ah tihhniam a ni dawn a, Minister-te’n awmpui 4 an neih thin chu 2-ah tihhniam tur niin, MLA-in 2 an neih thin chu 1-ah tihtlem tur a nih thu a sawi bawk. CM hian Minister-te lirthei kawl theih zat pawh tihtlem a nih tur thu a sawi a; CM leh Minister te tan lirthei thar an lei dawn lova, Minister kalchhuak ta te hmanlai chu tha tawka an hriat thu leh MLA-te car leisak thin tihtawp a nih tur thu a sawi bawk.
CM thar chuan ‘aikal’ la zawng zawng leh mahni post lova awm mek zawng zawngte chu January thla ral hma-in in-report a, justification nena an thehluh chu Resource Mobilisation Committee-in a endik dawn tih a sawi bawk a. Tul lova sawrkar sum senna endik a nih theih nan department zawng zawngin January thla thar hmain functioning and non-functioning asset an neih zawng zawng thehlut tura tih an nih thu a sawi a. Work Order issue tawh hna lo tan tawh chu cancel an nih loh tur thu leh Work Order issue tawh hna lo la tan loh chu ‘stay’ nghal tur a nih thu a sawi.
Corruption chungchang-ah Lokayukta chu thuam chak an duh thu sawiin, tun dinhmunah erawh thuam chak chi a ni nge ni lo an enfiah phawt dawn a ti a; Monitoring Committee din a nih tur thu leh Sawrkar leh ZPM Party chauhin an endik dawn lova, Zoram mipui zawng zawng aiawh kim an awm dawn a, recognised party tin atangin pakhat theuh, NGO, MKHC, MPF atangin an thu dawn tih a sawi bawk a; chungte chuan ram project endiktu-ah an tang dawn niin a sawi.
Pu Lalduhoma chuan Finance Dept-ah SEDP tan Rs vbch 150 dahthat a ni a, hei hi thuleh awm hma chu khawih chêt an tum lo a ti a. Minister tin te chu an department chan theuh an enkawl dan tur road map pek vek an nih tur thu leh chumi zulzui chuan a tlachawp ni lovin policy-a an lo duan tawh hmangin an department chan theuh an enkawl dawn tih a sawi a ni.
CM chuan Resource Mobilisation Committee an din tur thu leh chumi-ah chuan inremchem dan, sum hman tihtlem dan tur leh man power assessment an duang dawn a; chutah chuan Minister-te’n hma an hruai dawn niin a sawi. CM chuan State Marketing Board din a nih tur thu a sawi bawk a, thlai thar lei a nih tur thu leh vegetable supply chain te, thlai thar processing, skill development leh a kaihnawih dangte nen he Marketing Board hian hman an la dawn, a ti.
Boundary Committee pawh din an tum tih CM hian a sawi a; hetah hian mipui aiawh a kim thei ang ber telna tur an duang dawn tih a sawi. MSSSB leh SEDP Board te thiah nghal an tum thu leh Resource Mobilisation Department Board pawh thiah nghal tur a nih thu a sawi bawk.
