Dan lova India khua leh tui nih tum do zel dawn

02 Nov 2026: Inrinni khan Mizoram Chakma Students’ Union (MCSU) Lunglei Zone buatsaih ‘6th Annual Freshers’ Meet cum Awareness Campaign’ chu Convention Centre-ah neih niin YMA Sub-Hqrs Lunglei aiawhin Pu C.Lalrindika, Secretary, Pu Zohmangaihsanga Chhakchhuak leh Tv.H.Lalawmpuia SEC Member ten an hmanpui.

He hunah hian Pu C.Lalrindika, Secretary YMA Sub-Hqrs Lunglei chuan zirna kawnga zirlai tharte fuihin, an thupuia an thlan “Beyond Limits, Towards Excellence” tih chu nunpui ngei tur leh, an thiamnate chu district leh state hmasawnna atana hmang turin a chah.

Ram chhung muanna leh inpumkhatna vawng nung reng turin Chakma thalaite chahin, state pawn lam atanga infuihpawrhna leh ram thendarh zawnga politics khelh tumna reng reng fimkhur taka hnawl zel turin a ngen a. Chutih rualin, tun hnaia Chakma Zirlai pawl pakhat thuchhuah vanga hnam inkar buaina thleng thelh chungchanga Mizoram Chakma-ten thupha (apologize) an chawi chu thil lawmawm tak a nih thu sawiin, hetiang thil a lo awm leh a nih pawhin boruak ti dai turin a rang lama hma la zel turin a chah bawk.

Pu C.Lalrindika chuan YMA-in ruihhlo dona kawngah hma a la mek tih sawiin, hei hi ram Issue a ni tawh a ti a. Lunglei khawpui leh khawpui dangah te Chakma chen tamna khawthlang lam atanga zû rawn tawlh luh a tam hle tih sawiin, hei hi Central YCA leh MCSU te pawh tan la a tihrem dan zawn tlan a ṭul a ni a ti a. Tunah hian zirlai ṭhenkhat leh Lunglei lama Chakma khawsa ṭhenkhat, veng hrang hranga zu tawlh ru leh zuar kual an awm mek a, hengho hian an simna tura hma lak a ṭul thu a sawi.

Pu C.Lalrindika chuan, Mizoram inpumkhatna chhe zawng emaw foreigner-te tana shelter buatsaih zawnga chetna leh infuihna reng reng chu YMA hian a do zel dawn a ni, a ti a. Mizo te hian India Citizen dik tak, Mizoram Chakma thlah kal zelte kan haw ngawt lo. Kan huat zawk a chu Mizoram mi leh sa Chakma te inphen nana hmangtu che u, khua leh tui ni lo foreigner thiam taka in chanvo dik lo taka chhuhsak tumtu che u erawh kan lawm hauh lo thung a ni, a ti.

YMA-in dan lova India khua leh tui nih tum foreigner-te a do tlat zel dawn a. Chakma te pawh a hnam anga in pun dan enchianga, piang pung ni lo va a ruk a pem te avanga in punna rate sang ni a lang thin chu Mizo te ngaihmawh leh YMA-te’n kan pawm theih loh a ni. Bangladesh a ni emaw Myanmar a ni emaw, foreigner hi chu foreigner an ni reng a, chung atanga lo lutte dik lo taka khua leh tui dinhmun lo pek tum kan awm ru thin te hi Indian kan nihna a rinawm lohna a ni. YMA chuan Mizoram chhiatna tura ke penna apiang chu a Guardianship a lak angin a hmachhawn zel dawn a ni, a ti bawk.

MCSU, Zonal Hqrs Lunglei-in report-a an tarlan danin tun dinhmu ah Lunglei khawpui ah Chakma chhungkaw -113 awm mekin, Zirlai hi 1 KG atang College kal mek – 549 Lunglei khawpui-ah an awm mek bawk.

MCSU Zonal Hqrs Lunglei in Freshers Social cum Awarness Campaign an neihnaah hian Pu Molin Kumar Chakma -Adviser to CEM (CADC), Dr.Joyti Bikash Chakma- President Central YCA te an tel bawk.