FCRA Amendment Bill 2026 duhlohna ‘Black Day’ hmang

21 July 2026: Vawiin chhun dar 12:00 khan Lunglei District Congress Committee (LDCC) chuan Foreign Contribution Regulation Act Amendment Bill 2026 duhlohna ‘Black Day’ Mizofed Kawt Venglai Lungleiah an hmang.

LDCC buatsaih FCRA Amendment Bill 2026 duhlohna puala hun hman Pu Eric R.Zomuanpuia LDCC Treasurer kaihhruaiah hian LDCC President Pu R.Lalnunthara chuan, FCRA Amendment Bill 2026 dodalna inkhawm chu Congress Party buatsaih ni mahse, Mizo mipuite leh Kristiante tana thil pawimawh tak a ni a ti.

Mizoram chhunga Kohhran hrang hrangte’n Pathian rawngbawlna atan Foreign atangin sum an dawng thin a, chutiang bawk chuan tlawmngai pawlte pawhin Foreign atanga sum dawng ve thinin, miharsate tanpui nan leh khawtlang leh ram hmasawn nan tangkai takin an hmang thin.

Hetianga FCRA kum 1976 atanga tangkai taka Kristiante’n kan hman thin chu kum 2020 atang khan BJP sawrkar chuan harsatna siam tanin, FCRA License renew te pawh an phal lo va, kum 2020 atanga FCRA kalphung tih danglam avang hian Mizorama Kristiante’n kan tuar nasa em em a. Tuna FCRA Amendment Bill 2026 Parliament a pass an tum phei hi chu Kristiante tan dan sakei anih avangin pass anih lohna turin kan zavaiin i do tlang ang u, a ti.