HATIM-a Social Work Deptt zirlaite’n Observation Visit neiin, LDCC Bhavan-ah hun an hmang
Aug ni 30 chawhnu lam khan Higher & Technical Institute of Mizoram (HATIM) a Social Work Deptt zirlaite chuan Observation Visit neiin, Lunglei District Congress Committee (LDCC) Bhavan-ah hun hman a ni a, LDCC President Pu KL Chhawnzauva chuan kaihruaiin HATIM atangin zirlai 27 leh zirtirtu pahnihte nen hun an hmang ho a ni.
He hunah hian Pu Joseph Lalremngheta, GS LDCC chuan inhmelhriat tirna neiin, Pi Rebecca LP Lalnunhlui, Asst. Professor Social Work Dept HATIM chuan thusawina leh HATIM atanga kalte inhmelhriattirna hun a hmang bawk. Pu Moses Lalrinchhana Chinzah, President LDYCC chuan zirlaite tan presentation neiin, India rama Congress Party lo indin chhoh dan leh Mizoram a Congress party-in sawrkarna an chan chhunga Mizoram a development hrang hrang langsar zualte leh Lunglei District bika Congress party-in development a lo thlen hrang hrangte a tarlang.
Observation visit-ah hian zirlaiten zawhna hrang hrangte siamin, zawhna te chu LDCC atangin a theih ang ang chhan sak an ni.
Zawhna chhangin Pu KL Chhawnzauva chuan “Congress Party chu party upa tak leh ruhrel nghet tak nei a ni a, miharsate leh mi hnuaihnungte tana ding tlat thin, mipuite tana belh tlak leh Sakhaw zalenna ngai pawimawh em em tu an ni, a ti.
Pu PC Lalthanliana EX-MLA leh GS MPCC ni bawk pawhin zawhna chhangin, “HATIM Campus-a Tribal Girls Hostel chu Social Welfare Minister anih laia an hmalak anih thu leh HATIM panna kawngte chu an hunlaia Zirlaite hmakhua an ngaih avanga an hmalakna pakhat a nih thu a sawi a. Congress party President Pu Lalsawta chu Mizoram a Finance Minister anih laia Mizoram Budget min surplus pui theitu a ni tih sawiin, sum leh pai enkawl thiam leh thalaite tana hmathlir nei tha Pu Lalsawta kaihhruai Sawrkar a din a pawimawh thu a sawi.
Pu Lallianzuala Khenglawt Secretary MPCC pawhin, “Mizoram a remna leh muanna a awm theih nan Pu Lal Thanhawla’n Chief Minister dinhmun Pu Laldenga hnenah a ken avangin Mizoramah hmasawnna nasa tak a awm theih phah ta ni, a ti.
He hunah hian C.Lalrinmawii, I Sem BSW chuan LDCC te hnenah lawmthu sawina thilpek HATIM aiawhin a hlan a, Jeffrey RK Lalhluzuala, I Sem BSW chuan lawmthu sawina hun a hmang bawk.
