Leitlangpui Music Festival 2026 tan

12 Nov 2026: November ni 11–13, 2026 chhung awh tur Leitlangpui Music Festival (LMF) 2026 chu nimin khan Lena Stadium, Serkawn, Lungleiah ṭan niin, Lunglei High Powered Committee (HPC) Vice Chairman Pu V Malsawmtluanga’n a hawng.

Tlai dar 5:30-a Leitlangpui Music Festival 2026 hawnna inkhawm buatsaihah Lunglei HPC Vice Chairman Pu V.Malsawmtluanga chuan Serkawn Concert hmachhuana LMF huaihawt a nih theih nana hma latu, a bul ṭan laia Tourism Minister Pi Lalrinpuii leh tuna hlawhtling lehzual tura hma lakna chhawm nungtu Tourism Minister Pu Lalnghinglova Hmar te chungah lawm thu a sawi a. Tourism Minister kaihhruaina hnuaiah Mizoramah khualzin tam zawk an lo luh theihna tur leh awmze nei zawka hun an rawn hman theihna turin event calendar felfai tak siamin hma lak a nih thu sawiin, tourism tihchangtlun nan Rs vaibelchhe 614.88 hu project 13 kalpui mek a nih thu a sawi bawk.

LMF hawnna hun hman zawhah concert-in chhunzawm a ni a. Concert-ah hian Deborah Ralte, Saka, CT Tluangtea, Benjamin Sum, FENGa, Sangtei Khuptong, David Darlong, Bzi Tochhawng, Lil Kiki leh Evenflow te an inlan.

LMF 2026-ah hian zaithiam hrang hrangte nen rimawi kutpui hun hman a nih bakah, Kut chhimtute tan ei leh in, souvenir, hnam thuam leh kut themthiam thil chi hrang hrang zawrhna stall leh intihhlimna hmun te ruahman a ni a, stall hrang hrang 100 vel hawn a ni.

Vawiin, November ni 12 tlai dar 5:00 aṭangin Leitlangpui Band Contest top 10 intihsiakna buatsaih a ni dawn a. Abstract Analogy (Lunglei, Mizoram), Divine Cardinal (Lunglei, Mizoram), Earthiest (Aizawl, Mizoram), Fredys (Aizawl, Mizoram), Optic Inertia (Diphu, Assam), Portraits.MP3 (Aizawl, Mizoram), Since 90’s (Dimapur, Nagaland), Skyriff (Silchar, Assam), X! plode (Aizawl, Mizoram) leh Zerro (Aizawl, Mizoram) te an intihsiak ang a. Band Contest lawmman atan hian Rs nuai 5 ruahman niin, zan lamah result puan nghal a ni ang a, Swordtune (Winners 2024), Knot (Winners 2025) leh Avora Records (Guest Band) te an inlan bawk ang.

A tawp ni, November ni 13-ah tlai dar 6 aṭangin concert buatsaih niin, zaithiam hrang hrang an inlan leh ang a. Tourism Minister Pu Lalnghinglova Hmar chuan a tawp zan hi a hmanpui ang.