24 Jan 2025: Beti Bachao Beti Padhao (BBBP) kum 10 tlin lawmna leh National Girl Child Day 2025 lawmna pualin vawiin khan Dawrpui Multi Purpose Centre, Aizawl-ah hun hman a ni.
He huna khuallian Chief Secretary Pu Khili Ram Meena chuan kum 2011 chhiarpui-a a landanin Mipa leh Hmeichhe naupiang inthlauhna chu Mipa naupiang 1000 zelah hmeichhe naupiang 918 chauh anih thu a sawi a. Hmeichhe naupangte an dam khawchhuah nan leh humhalh dan tur bakah zirna tha pek dan tur ngaihtuaha hma la turin Beti Bachao Beti Padhao (BBBP) Scheme chu Prime Minister Narendra Modi in January ni 22, 2015 khan Panipat, Haryana-ah a hawn thu a sawi a. Mizoramah chuan Siaha leh Serchhip-ah Child Sex Ratio a hniam avangin BBBP chu Pilot Project angin kalpui hmasak anih thu sawiin tun dinhmunah Mizoram district-ah Siaha leh Champhai te chu CSR hniamna district a la nih avangin heng district-ah te hian ngaih pawimawh hmasak a ngaih thu a sawi bawk.
Women and Child Development Director Pi Zoramthangi Chhangte chuan kum 10 chhunga BBBP anga hmalakna hrang hrang lo awm tawh te leh BBBP thil tumte hrilhhriatna neiin tun dinhmunah Mizoram chu Sex Ratio at Birth rate 956 girls per 1000 boys anih thu sawiin kalkhawmte chu khawtlang nuam tak dina, hmeichhe naupangte duat leh chawikanna kawnga tan la thar theuh turin a sawm a ni.
National Girl Child Day (NGCD) lawmna hunah hian hmeichhe naupang, kawng hrang hranga zirna leh infiamna lama hlawhtlinna nei mi 15 te hnenah chawimawina hlan an ni.
