Mizoram a thlai leh ranvulh a eizawngte hnenah vbch 25 chuang sem turin ruahman

30 Oct 2026: Vawiin khan PM-KISAN atanga kuthnathawktute tanpuina, a vawi 24-na tur chu Prime Minister Narendra Modi chuan Gujarat atangin a sem chhuak leh a. He hun hi Live a pek chhuah niin, India ram hmun hrang hrang atangin kuthnathawktu tam takte nen thlir ho a ni a. Mizoramah pawh District hrang hrang atangin Agriculture & Farmers Welfare Department huaihawtin kuthnathawktuten an lo thlir a, Directorate atang pawhin Agriculture Minister, Pu PC Vanlalruata hovin he programme hi lo thlir ve a ni.

Tun tum PM-KISAN semchhuahna programme hi a vawikhatna atan BHASHINI hmanga Mizo tawnga tihchhuah a ni.

Prime Minister hian India ram pumah Loneitu chhungkua vbch 9.34 tan Rs. vbch 18,690 a semchhuak a, a semchhuah rual hian direct benefit transfer (DBT) hmangin loneituten anmahni bank account ah an lo dawng nghal a ni.

Kumin 2026 hian tum hnih sem chhuah tawh niin, tun hi a tum thumna tur a ni a. A tum thumnaah hian Mizoram atanga thlai leh ranvulh a eizawng chhungkaw 1,27,064 te hnenah Rs 25,59,62,000.00 (vaibelchhe sawmhnih panga, nuaih sawmnga pakua leh cheng singruk sanghnih) sem chhuah tur a ruahman a ni.

PM-KISAN hi central flagship programme niin, kum 2019 atanga bul tan a ni a, hemi scheme hnuai ah hian thlai leh ran enkawl a eizawng tin hnen ah kumtin Rs. 6,000/- pek thin an ni a. Tanpuina an dawn hi thlai leh ran enkawlna atan a mamawh thenkhat leina tur a ni.

Kum 2019 atang a Mizoram farmers te hnen a PM-KISAN tanpuina pek chhuah tawh zawng zawng hi vbch 551.010 (Vaibelchhe Zanga sawmnga pakhat) a tling tawh a ni.