Mizoram Law College atangin mi 700 chuangin LLB degree an nei tawh

Gov’t. Mizoram Law College din champha vawi 40-na, Ruby Jubilee lawmna hun Legal Chamber, Govt. Mizoram Law College, Luangmuala hman chu nimin khan Law & Judicial Minister Pu T.J. Lalnuntluanga chuan khuallian niin a hmanpui a, Souvenir tlangzarhin jubilee lungphum a hawng nghal.

Pu T.J. Lalnuntluanga chuan Govt. Mizoram Law College-in kum 40-na hmel a hmu chu a lawmpui thu sawiin, tun hun thleng thei tura theihtawp thathawhtute fakawm a tih thu a sawi a. Govt. Mizoram Law College chu Mizo te’n dan leh hrai kan hriat theih nana thawhhlawk tak a nih thu tarlangin, heta tang hian Lawyer leh Judge chhuanawm tak tak an lo chhuak tawh a ni, a ti a. Zirlaite chu mi rethei leh hausa inkar zau tak tizim tura theihtawp chhuah turin a chah a ni.

Mizoram Law College hian Mizoram University hnuaiah Permanent Affiliation neiin, UGC recognized Institution niin, Grant dawng theite zingah a tel ve a. Kum 2013, September ni 19-ah Provincialisation hmuin Govt. Mizoram Law College tih a ni ta a ni.

Zirlai 187 awm mekin, mi 700 chuang laiin LLB degree an lo nei tawh a. Faculty 9, Administrative Staff 13 leh Library Staff 3 ten Law College hi an enkawl mek a ni.