Mizoramah kumin kum tir atanga April thla chungin Dengue vei 110 hmuh chhuah a ni
05 May 2024: Health Department hnuaia, Vector Borne Disease Control Programme, National Health Mission atanga thudawn danin Mizoramah Kumin kum tir atanga April thla chungin Dengue vei 110 hmuh chhuah a ni.
Hemi hun chhung hian Aizawl West, Aizawl East bakah Lunglei District-ah te Dengue natna hi a hluar bik tih thisen endikna atangin hmuh chhuah a ni a, Dengue natna avanga thi an awm loh thu dawn anih rualin Nikum khan he natna thihpui 2 an awm a ni.
Dengue natna hi thosi seh atanga inkaichhawn theih a ni a, a thehdarhtu hi thosi chi khat Aedes thosi a ni a. Aedes hian vawi khat Dengue hrik a pai tawh chuan a damchhung in a pai reng a, a seh apiang ten Dengue an vei tawh thin a ni. Aedes thosi hian chhun khaw en laiin mi a seh deuh ber thin a, ruahsur zawhah a pung hluai thin bawk a ni.
Health Department hotute chuan Dengue vei nia inringhlel an awm a nih chuan a rang thei ang bera damdawiin lam pan vat a, thisen endik tir nachang hre turin mipuite a ngen a ni. (DD)
