10 Oct 2024: Vawiin khan Chief Minister Pu Lalduhoma chuan Vanapa Hall-a Volunteers for Community Mental Health (VOLCOMH) bultuma World Mental Health Day 2024 lawmna a hmanpui a, Pi Lalrinpuii, Health Minister leh Pu Lalthansanga, Forest Minister te pawhin an telpui.
Thusawiin Chief Minister chuan, Rilru a hrisel loh chuan taksa a hrisel thei lo va, kan dam khaw sei thu hi taksaah chauh ni lovin kan rilru lamah a innghat tel a. Kan mut theih loh chhan tam takte hi kan rilru lama thil awmte vang a lo ni fo, kan suangtuahna zawk khan mu thei lovah min siam thin. Midangte ngaidam thei lo mihring hi an dam thei lo, ngaihdam hi damna a ni. Nitin hian duhthlan theih pahnih kan nei, hlim nge lungngaih tih hi? a thlangtu chu keimahni kan ni, a ti.
Kan thil thlir dan (attitude) hi a hrisel tur a ni a, kan nuna thil lo thleng tam tak hi kan tihdanglam theih loh, kan va inrawlh ve theih loh a tam. Nimahsela, chung thil kan lo dawnsawn dan zawk chuan kan chunga a nghawng dan kha a siam mai zawk a ni. Kan beisei ang thil a lo thleng ta lo a nih pawhin Pathianin duh dan dang a nei a ni tih lo pawm ve leh mai tur a ni, tiin he huna kal khawmte a chah a ni.
Pi Lalrinpuii, Health & Family Welfare Minister pawhin thusawiin, rilru hrisel nei tura thinlung lam ven that hi a tul hle a. A bik takin kan hnathawhna hmun hi kan hun tam ber kan hmanna a nih avangin a boruak kan tihnawm thiam a tul hle. Midangte tanpuitu nih duhna rilru pu chunga kan awm hian boruak nuam zawk a lo chhuak mai thin, a ti.
World Mental Health Day pual hian Poster siam leh Slogan phuah intihsiakna buatsaih a ni a. Lawmman semna neih nghal a ni.
Inkhawm hi Prof Zoengpari, President, VOLCOMH chuan a kaihruai a, Pi Lalparmawii, Vice President chuan hunserh hmangin, Dr. Lalropuii chuan VOLCOMH hmalak dan leh World Mental Health Day chanchin te, kumina World Mental Health Day thupuite a sawi a. Thupui hi “It is time to prioritized Mental Health in the Workplace” a ni. Green Ribbon Club, Pachhunga University College ten lemchan tawi an entir a ni.
VOLCOMH hi kum 1992 khan rilru hriselna zirtirna leh rilru lama natna laka mite venhim hna thawk tura mi tlawmngaite din a ni a. An thawhpui tur zirlai intelkhawm Green Ribbon Club hi Higher Secondary School pangaah leh Pachhunga University College ah te an din tawh a ni.
