Pawl hrang hrang 10 chuang aiawh kalkhawmten Kawngpui siam Hnatlangpui koh an tum
Thudawnnain a tarlan danin, Khawthlangtuipui Group YMA hnuaia Monitoring Committee, Tlabung VC leh Zodin VC huaihawta Aug ni 26, 2023 a pawl hrang hrang 10 chuang aiawh kalkhawmte chuan Lunglei leh Tlabung inkar kawng chhe zuallai siam turin hnatlangpui koh an rel a, a hun atan Aug ni 29 (Thawhlehni) an ruat.
Khawthlangtuipui group YMA Monitoring Committee chairman Pu Zokunga Sailo kaihhruaia pawl hrang hrang aiawh thukhâwmte chuan, National Highway 302 chu damlohna thil leh rikrum thilah pawh zawh ngam loh khawpa chhia a nih thu an sawi a, lirthei veivak a tlemin, a kal awmchhunte pawhin loh theih loh vanga chuan man an tihsan avangin mipuiten harsatna lian tak an tawk mek niin an sawi.
