Police (DEF) te tan ni thum chhung awh tur ‘Spiritual Retreat’ tan a ni

23 June 2026:- Mizoram Police kumpuan ‘Year of Discipline’ bawhzuina kal mekah Lunglei SP Pu J.Lalmuankima ruahmannain Lunglei Police (DEF) te tan ni thum chhung awh tur ‘Spiritual Retreat’ SP Conference Hall, Lunglei-ah vawiin khan neih ṭan a ni.

Hawnna inkhawmah Pu J.Lalmuankima, SP, Lunglei chuan thu sawiin, Police-te hi kan hna a hautak em avangin Khawtlangah leh Kohhranah te thuk takin kan inhmang hman meuh lo va, chhungkua te nen pawh hun zalen leh hun thawl kan nei lo fo ṭhin. Heng avangte hian rilru lamah harsatna tawkte pawh awm theih anih rualin, ruihhlo-in a tihbuai leh fihlim lo te pawh kan awm ve bawk. Hetiang anih avang hian kan rilru leh taksa hrisel ṭha taka a awm a ngai a, chutiang bawkin kan thlarau lam nun pawh a zalen a ngai hle a ni. Indaihlo leh hun chep tak karah hetiang programme hi siam a ni a, hlawk leh ṭangkai taka he hun hlu tak hi hmang ṭheuh turin ka chah che u a ni a ti. He Spiritual Retreat-ah hian Mission for Chirst Team ten an hun hlu tak senga hun min rawn hmanpui thei hi a lawmawm hle a ni, a ti bawk.

Pu Sangtea Ronald, Speaker, Mission for Christ chuan hun a hmang nghal a, Police personnel 38 an tel a ni.

He Retreat-ah hian Lunglei Police-te kim taka an tel theih nan kal hun tur hi a inchhawka ruahmanna siam a ni a, June 24 & 25, 2026 ah chhunzawm a ni anga, a mamawhtute tan Mission for Christ Team-in Counseling an neihpui ṭhin ang.