11 April 2025: Rajya Sabha MP Pu K.Vanlalvena’n an ram luahchin tlansana Mizorama raltlan thalaite chu mahni ram chhanhim tura haw turin a chah.
He thu hi vawiina Mizo Hnam Run chhung inkhawmah sawiin Pu K.Vanlalvena chuan Chin state, Mizoram let thum vela lianah mipui nuai nga vel bak an awm tawh lo, an tlan darh nasa a, Aizawl, Lunglei leh Champhai khawpuiah Chin nula tlangval an tam lutuk, Ral do turin an haw a ngai a ti a, Chin state khi an ram an ti anih chuan Burma sipai do turin haw se, tanpui an ngaihna apiangah an tanpui ang a ti.
Manipur Zohnahthlak te pawh an ram tia an chhal chinte humhalh zel an duh chuan an raltlanna ata kir se, ram chhan turin haw a ngai, a ti.
Pu Vanlalvena chuan, kum 2021-a Myanmar tualchhung buaina avanga rawn tlan thla chu sawrkarin rei tak a chawm hnuah an tih chhunzawm theih reng loh avangin hmun hrang hrangah raltlan an awm darh nasa a ti. Chin State Mizoram let thum vel laia lianah mipui nuai 5 vel bak an awm tawh lo a ti a, Manipura zohnahthlak te pawh chi leh chi indona sim a pawimawh a ti a, Mizoram hmun hrang hrangah Manipur raltlan thalaite awm ngawt lovin an hmelma do turin an haw a ngai a ni, a ti.
Pu Vanlalvena chuan MNF Party chu Mizoram leh hnam tana kal na ngam ber a ni a ti a, Assam nena ramri buai chungchangah pawh huai takin Mizoram tan an kal thin tih sawiin ram leh hnam tana hma la nasa ber an ni a ti.
Rajya Sabha MP chuan tunhnaia Mizoram assembly budget session-a Chief Minister Pu Lalduhoma’n Uniform Civil Code chungchang a sawi chu thu belhchian dawl lo a ni a ti a, UCC chu an sawrkar laia do nasa ber an ni tih sawiin UCC bill chu parliament ah put luh a la ni ngai lo va, vote lak a la ni lo tih sawiin, MNF sawrkar laiin UCC duh lamah vote an pe a tih chu thudiklo a ni tih a sawi bawk. (AIR Aizawl)
