10 Oct 2024: Vawiin chawhma dar 10:00 khan Home Minister Pu K. Sapdanga chuan Narcotic Drugs and Psychotropic Substances Act 1985 hnuaia Ruihhlo do leh, a kaihhnawih a harsatna thleng thinte zirhona (WORKSHOP ON THE NARCOTIC DRUGS&PSYCHOTROPIC SUBSTANCES ACT, 1985 & GENERAL PROVISIONS OF INQUIRIES AND TRIALS: ISSUES AND CHALLENGES), ATI Auditorium, MINECO, Aizawl Khatla-a neih chu khuallian niin a hawng.
Khuallian chuan kumin August thla thleng chauhva heroin man zat chu nikum chhung zawnga man zat thuak a ni tawh tih sawiin, thalai ten an thihpui nasa hle tih a sawi a. Kohhran leh tlawmngai pawl ang te, Sawrkar leh Court lam ang pawha thawhhona tha leh zual neih chu a kawng pawimawh ber nia a hriat thu a tarlang a. Eng emaw chenah, Mizote khawtlang anga kan kalphung thenkhat chu ruihhlo do kawnga harsatna siamtu a nih dan te sawiin, chumi lam hawi a zirhona buatsaih a nih chu tha a ti hle a, kalkhawmte chu a hlawk thei ang bera zirhona chu hmang turin duhsakna a hlan nghal a ni.
Justice Nelson Sailo, Judge, Gauhati High Court & Chairman, HCLSC pawhin ND&PS Act 1985 hriat chian pawimawhna leh eng dan pawh, a tum ang taka ken kawh a pawimawhziate sawiin; Justice Michael Zothankhuma, Judge, Gauhati High Court&Executive Chairman, MSLSA pawhin ruihhlo chu khawvel ram tin deuh thaw a buaipui a nih dan te, a dona kawngah chuan dan keng kawh thei tura tanrual chu sawt bera a hriat thute a sawi bawk.
Workshop hawnna hi Pi F Laltlansangi, MJS chuan kaihruaiin, Dr HTC Lalrinchhana, MJS, Registrar, Guwahati High Court, AB and Secretary, HCLSC ni bawk chuan kalkhawmte lo lawmna thu a sawi a ni.
